Nongstoiñ, Risaw 05
Ka jingthrang bad kut jingmut ha ryngkat ka jingïai minot bad trei shitom bunsien hi ka wanrah ïa u soh uba thiang ha ka jingim jong uno uno u briew lane kino kino ki samla.
U samla Kyrshanborlin Wahlang, 23 snem ka rta uba shong ba sah ha Block II jong ka shnong Upper New Nongstoiñ bad uba dei ruh u khun ba san jong ka Kong Ritalis Wahlang bad jong u (L) Sorlington Lyngkhoi bad u don 6 ngut shipara, uba dei u nongshna phlim na Nongstoiñ, ïa kaba ym lah ban len ba wat kiba bun ki para dong bad ki para thaiñ jong ka West Khasi Hills kumjuh ka Jylla kim pat ïoh sngew ïa ka kyrteng ka jong u hynrei ka phlim jong u ïa kaba la ai kyrteng, ‘Ki Dak Bym Thoh’ (Ki Ktien Bym Thoh) ka la ïaid kylleng ka ri.
Na ka Brahmaputra Valley Film Festival kaba pawnam bha, kane ka phlim mynta kan leit sha Russia ban pyni ha Kinovertikal kaba long ka International Festival bad Competition kaba manla u snem na ka bynta ki phlim ba la pyni da ki khynnah bad ki samla rangbah ha ka 6 tarik u Lber.
La jied ruh da kaba thikna ban pyni ha Jharkhand ha ka Dharti Abba Tribal Film Festival kaba nyngkong eh kaba la buh ban long ha ka 16 haduh 18 tarik u Lber.
U samla Kyrshanborlin Wahlang haba ïakren bad u nongthoh khubor u la ïathuh ba la pyni ïa kane ka phlim ha ka jingïakob phlim lyngkot jong ka Montage Student’s Film Festival Hyderabad ha u snem 2024.
Shuh shuh kane ka phlim ka la ïoh rung ruh sha ka Frames for Change 2025, ka tamasa phlim lyngkot ba la pynlong lang da ka ‘Cinema for a Cause’ ba la pynïaid da ka Lifeplus Magazine bad wat u la ïoh ruh ban khur ïa ka takma rnong ha ka Talking Films Online (TFO) 2025.
Haba batai bniah halor kane ka phlim, u samla Kyrshanborlin u la ong, ‘Ki Dak Bym Thoh’ ka dei ka phlim lyngkot kaba 10 minit kaba bud ïa ka jingim jong ki arngut ki khynnah, u Phrang bad u Albert. Katba u Albert u tbit bha kum u khynnah skul uba nang thoh nang tar, u Phrang, u khynnah bym nang thoh nang tar, u aiti ïa lade ban nang ïa ka jingstad jong ki kpa tymmen ba la hiar pateng na u kpa jong u, kaba ïalam sha ki jingkylla bym lah khmih lynti ha ka plot”.
“Kane ka khana ka pynkynmaw ïa ngi ba teng teng ha ka jingim, kiei kiei kiba rit kiba ngim poi pyrkhat phewse ki kylla long kiei kiei kiba kongsan tam,” u la ong.
Haba ïakren pat bad ka jingïaid lynti ka jong u ha kane ka kam, u la ong ba u la sdang naduh u snem 2019 da ki khana bym lah ban ïathuh ba la ker hapoh ka jingmut jingpyrkhat jong u.
U la ïathuh ruh ba u la shem ïa ka jingsngewtynnad ban pynkylla ïa ki bad ban ïasam ïa ka jinglap sha ka imlang sahlang bad ki nongpeitkai da kaba ïashim bynta nyngkong eh ha ka jingïakob video lyngkot jong ka tnat Election jong ka ri India, ba la pynlong da ka West Khasi Hiller Hills Office Deputy Commissioner bad kane ka long ka sienjam kaba nyngkong eh na ka bynta jong u.
Shuh shuh u la ong ruh ba ha kaba nyngkong da ka phone ba u la shu pan kylliang na kiwei na ka bynta ka phlim lyngkot jong u, ka ‘My Vote My Voice’ ha kaba kane ka phlim lyngkot ka la ïoh ïa ka khusnam kaba ar bad naduh kane ka por um shym la kynran dien noh hynrei u la pynleit jingmut bad ïa ka sap kaba u don bad ha u snem 2023 u la leit ban pule noh da ka Mass Media hapoh ka St. Anthony’s College.
“Ha ka por ba nga dang pule ha ka semester ba nyngkong ka jingangnud jong nga ka long ban shna ïa ka phlim lyngkot bad ban submit sha ka Brahmaputra Valley Film Festival, nga la pyndonkam ïa ka library jong ka kolej ban wad bniah bad pule ïa ki kot khana, bad ki kot kiba ïadei bad ki jinghikai shna phlim,” ong u samla Kyrshan.
Shuh shuh u la ïathuh ruh ba na ki kot, ki jingmut ki jingpyrkhat jong u, ki la ktah bha ban shna noh kawei ka phlim kaba ïadei bad “ka juk jingpule mynta bad ka jingstad tynrai jong ki kpa tymmen jong ki Khasi”, bad da ka jingai jingmut jong ka Dr. Cherry Kordor A Kharshiing kaba dei ka heh ka tnat pule jong ngi, nga la ïoh ban ai kyrteng ïa kane ka phlim, “Ki Dak Bym Thoh (Ki Ktien Bym Thoh),” u la ong.
U samla Kyrshanborlin u la batai ba ka kyrteng jong kane ka phlim ka thew ïa ka jingstad kaba ym lah ban shem hangno hangno ruh namar ym shym la thoh ne shon ha kino kino ki kot. Hynrei ka jingstad kaba u kpa jong u Phrang u pynsah ha la u khun ka sah kum ki “ktien bym thoh”.
U la ong ruh ba kum u samla pule ha ka semester kaba san jong ka Mass Communication bad ka Video Production, ban ïa pynïaid ryngkat ïa ki jingkitkhlieh ha ka pule puthi bad ka jingshna phlim ka long kaba eh, khamtam eh ban pynïaid ïa ka mang tyngka jong ka phlim hynrei ka jingieit jong u ïa ka kam shna phlim ka la pynlong ïa u ban wad ki lad ki lynti kiba thymmai ban jop ïa kine ki jingeh.
Nangta, u la ong ruh ba don ïa ka khana jong katei ka phlim, hynrei u la duna ka pisa ban pynmih ïa ka bad ha ka jingkutlad ka jong u, la jia ryngkat u la ïoh khur T.15 hajar na ka jingïakop shna ‘reel’ kaba la pynlong da ka Meghalaya Aids Control Society (MACS) bad da kane u la lah ban sdang ban ring bad ban pyndep ïa ka phlim”.
U samla Kyrshanborlin u la ïathuh ruh ba ïa kane ka phlim “Ki Dak Bym Thoh” u la pynlut por ban thoh ïa ka script kumba ar bnai, nangta u pyndep ban shoot tang hapoh 3 sngi bad ïa ka post production ka la shim por ïa u haduh 3 bnai namar ka jingbym biang ki kor shna bad pynwandur.
U la ong ruh ba ha ka jingbym biang kum ki drone ban shoot hynrei u shu teh ïa ka mobile phone ha u siej nangta u hap ban kiew ha tnum ïing bad ban pynïoh kum ka drone shot bad ïa ka sound u shu record da ka mobile namar bym biang ki tiar sound kum ki shot gun mic lane ki tiar ban record ïa ka sur.
Ha ka por ba u shna ïa kane ka phlim u dang don 21 snem, bad ka festival kaba nyngkong eh kaba u leit ïuh kjat ka dei ka Brahmaputra Valley Film Festival hapoh Guwahati bad u la ïohlad ban ïakynduh bad ki director Bollywood kum u Prakash Jha bad u la ïohlad ruh ban ïakynduh bad ki director kiba wan na kylleng ka Ri India.
U la ong ruh ba ynda u la pyndep ïa ki jingpule un ïai tih ïa ki khana ba buhrieh jong ka Ri Khasi bad un pynwandur ïa ki ha ki phlim bad ïa kaba mynta u dang ïaleh ban pynwandur ïa kawei ka script ban ynda la biang ka por un sa sdang noh ïa ka ban ring bad pynwandur ïa ka.
