Shillong, Risaw 05
U Myntri Rangbah ka Jylla, u Conrad K. Sangma ha ka Sngi U Blei u la leit ban ïashim bynta ha ka jingïalang pynhap pyrda ïa ka jingrakhe Jubili Rupa jong ka Indian Catholic Youth Movement (ICYM) kaba la long ha Divine Retreat Centre ha Kerala.
Ïa ka Mass Bakhuid la pynbynta da u Cardinal Felipe jong ka Goa bad u President ka Conference of Catholic Bishops of India (CCBI).
Ha ka jingkren jong u, u Sangma u la ai khublei ïa ka ICYM kaba la kynjoh ïa 25 tylli ki snem jong ka jingshakri bad ka jinglong nongïalam. U la ban jur halor ka jingdonkam ban long kiba shlur ban sakhi, bad ban im ïa la ka jong ka jingngeit ha man la ki bynta jong ka jingim.
U la kyntu ïa ki samla ban long ki sharak jong ka jingkyrmen, ban ïeng skhem hakhmat ki jingeh, bad ban pyndonkam ïa ki rynsan jong ki ban pynkhraw ïa ka jingshisha, ka hok bad ka jingsngewrit.
Ha kajuh ka por, u la ïaroh ïa ka ICYM kaba la pynwandur ïa ki nongïalam kiba ïeng ha ka nongrim jong ka hok, kiba tei ïa ki jingkieng jong ka jingsngewrit, bad kiba ai mynsiem halor ka kolshor jong ka jingshakri.
U la pynshlur ruh ïa ki samla ban buh hakhmat eh ïa ka koit ka khiah, ban ïaid shakhmat bad ki jingtbit kiba lah ban treikam, bad ban pyndonkam ïa ka teknoloji kum ka atiar jong ka jingshisha bad ka jingsbun mynsiem.
U la kyntu ruh ïa ki ban weng ïa ki jingïapher bad ban shakri da kaba kynthup lang, da kaba kdup lang ïa ka jinglong hok, ka jingshlur bad ka jingsngewrit.
“To ai ba kane ka Jubili kan long ka ding ba rhem kaba pynmeh biang ïa ka mynsiem jong phi, ka jingeh ka ban pyn-nep ïa ka jingthmu jong phi, bad ka jingkhot kaba pynlong ïa ki kjat jong phi ban ïaid. Ïalam da ka jingshlur, shakri da ka jingsngewrit, bad tyngshaiñ da ka jingshai U Khrist”, u la ong.
Haba kyntu ïa ki samla ban pyndonkam ïa ka juk ‘digital’ ban tei, ym ban pynpra, u la ong, “Pyndonkam ïa ka seng kam seng jam ha ka imlang-sahlang ban kyntiew ïa kiba shah iehnoh beiñ. Pyndonkam ïa ki jingïadei ha ka pyrthei ban pyrkhat heh bad ban leh katkum ka jinlong jong ka thaiñ.”
Shuh shuh u Myntri Rangbah u la ai khublei ruh ïa ka ICYM halor ka jingrakhe Jubili Rupa jong ka bad kyrpad ïa ki samla ban long ki nongwanrah jingkylla ha ka Balang, ka Ri, bad ka pyrthei.
