Shillong, Risaw 05
Ha ka 05 tarik u Risaw 2025, kawei ka trok kaba kit masi ka la sahkut sbak hapdeng surok khlem lah ïaid shuh hadien ka jingtwa ka khyndew bad ki maw ha shilynter ka surok bah Shillong-Pynursla-Dawki hajan Laitlyngkot.
Ka jingtwa jong ka khyndew bad ki maw ka la syngeit ïa katei ka trok kaba la pynsahkut lut ïa ki kali ba leit ba wan. Ha kane ka jingjia donbok pat ba ym shym la don ba mynsaw.
Ha kine ki khyndiat sngi, kawei ka kali Maruti 800 ka la shah pynjulor jur ha katei kajuh hi ka jaka na ka jingtwa khyndew.
Katkum ka jingïathuh jong ki briew na katei ka thaiñ, ba katei ka trok ka dang ïaid bad kit masi, hynrei ka la ïakynduh ïa kane ka apot, ha kaba ka khyndew bad ki maw na ka jingtrei surok ki la twa, kaba la pynlong ïa katei ka trok ban sahkut hapdeng surok.
Kane ka jingjia sahkut katei ka trok hapdeng surok, ka la wanrah ïa ka jingdheng kali kaba jur bha, ha kaba ki kali nongjngohkai pyrthei ki la hap ban phai biang hadien ba ki la sahkut da ki kynta.
Kane ka jingtwa khyndew ka dei namar ka jingjur jong u slap ha ka thaiñ Pynursla, kaba la pynlong ïa ka khyndew bad ki maw ban shong synjor.
Ki bor pynïaid ki la khang ïa ka leit ka wan hapdeng ka Laitlyngkot bad Lyngkyrdem man ka sngi naduh ka por 11:30 mynstep haduh 4:00 janmiet bad 9:00 baje mynmiet haduh 4:00 baje mynstep kum ka lad jingïada.
