Shillong, Risaw 06
U Myntri ka tnad Community & Rural Development (C&RD), Bah Sosthenes Sohtun u la khot na bynta ka jingïatreilang hapdeng ka Meghalaya bad Assam ban ïakhun pyrshah ïa ka jingeh jong ka jingjaboh ka lyer ha Byrnihat.
U Bah Sosthenes haba kren sha ki nongthoh khubor ha ka Lah Sngi U Blei u la ong ba u ju pynpaw ïa ka jingsngewkhia halor ka jingjaboh kaba mih na ki karkhana ha Byrnihat na ka por sha ka por.
Haba kdew ba bun ki karkhana ki la shah khang khyrdep, u la ban jur halor ka jingdonkam ban don ka jingïatreilang hapdeng ka Meghalaya bad Assam ban tehlakam ïa kane ka jingeh.
“Ka jingjaboh kaba mih kam dei tang na Meghalaya. Ngi don ki khappud ba ïasoh lang hapdeng ka Assam bad ka Meghalaya. Kumta, ngim lah ban ong ba ka jingjaboh kaba mih ka dei tang na Meghalaya,” la ong u Bah Sosthenes haba pynpaw ïa ka jingjwat jong kane ka mat.
Na ka liang u Bah Sosthenes u la ban jur halor ka jingdonkam jong ka jingjurip lang hapdeng ki ar Jylla ban wanrah ïa ka saiñdur kaba shai ban pynduna ïa ka jingjaboh.
“Kumta tad haduh bad lymda ka ‘Joint Survey’ jong ka Meghalaya bad Assam ka mih ryngkat bad ki jingthmu ban pynduna ïa ka jingjaboh, te kan long kaba eh (ban pynbeit ïa kane ka kam) lada ngim lah ban ïatreilang ban shimkhia ïa kane ka mat,” u la pynpaw.
U Myntri u la pyntikna ruh ba ka Meghalaya State Pollution Control Board (MSPCB) ka la shim ïa ki sienjam kiba tyngeh pyrshah ïa kito ki karkhana kiba pynmih palat ïa ka lyer jaboh. Ka Byrnihat ka la ïakhun pyrshah ïa ka jingjaboh ka lyer kaba jur bha, ha kaba dang shen, katei ka jaka ka la shah ñiew ruh kum ka jaka sor kaba jaboh tam ha ka pyrthei da ka IQAir.
Ka Sorkar Meghalaya ka la shim ïa ki lad ki lynti ban weng ïa kane ka jingeh, kynthup ban khang ïa ki karkhana kiba pynkheiñ ïa ki kyndon pynjakhlia mariang bad ban buh ruh ïa ka bai lutksan mariang ïa kito ki karkhana ki bym kohnguh ne bud ïa ki kyndon.
Ha kawei ka liang, u Bah Sosthenes u la batai ïa ki mat ba kongsan jong u kum u Myntri ba dei peit ïa ka tnad C&RD da kaba ban jur halor ka jingdonkam ïa ka jingpynïaid kam kaba bit ba biang ban pynïasoh bad ki briew, khamtam ha ki jaka nongkyndong. Hynrei u la ong ba haba phai sha ka rai mano ba dei ban don ha ka Kynhun Myntri, kata ka dei ka hok jong u Myntri Rangbah ka Jylla, u Conrad K. Sangma.
