Shillong, Risaw 06
Ka Khasi Students Union (KSU) Shillong Mihngi Circle hapoh ka jingïalam jong ka Farmers and Consumers Protection Cell ha ka 06 tarik u Risaw 2025, ka la leit khang ïa kawei ka dukan die dawai kaba kyrteng ‘ANSHU MEDICAL’ kaba dei jong u bar jylla, u Anup Dey kaba don ha Polo.
Ka jingleit khang ka seng ïa katei ka dukan ka dei namar ka jingbym ?on ïa ka laisen jong kawei ka DR (BAMS) Ayurvedic kaba ai dawai ha katei ka dukan bad ba ka dei ka khynnah pule na NEIAH. Ka seng ka la lap ruh ba katei ka doktor kam shym pat don ka lisen ban pyntbit hynrei tang lyngba ka ‘provisional’ bad ki ‘internship’ ba dang dep tang shiteng por ka lah trei bad ai dawai ha katei ka pharmacy mynta la kumba lai bnai tam eiei. Ka jingleh jong kane ka doktor ka long kaba be-aiñ bad kaba buh jingma ïa ka koit ka khiah jong ki paidbah kiba wan shim dawai na kane ka dukan.
Ka seng ka la maham bad khang shi syndon ïa katei ka doktor, ba kam dei ban pyntbit khlem pat don ki kot ki sla, kum ka lisen kiba pura lyngba ka jaka pule bad kumjuh ruh na ka tnad ba dei peit ïa ka koit ka khiah jong ka Sorkar Jylla. Ha kajuh ka por ka seng ka la khang ïa kane ka dukan die dawai kaba khlem shim khia ban da peitbniah bin pa bin ïa ki kot ki sla jong kane ka doktor.
Ha kine ki sngi ban wan ka seng kan sa leit ban ïakynduh bad ki bor pynïaid ïa ka jaka pule ba pyndep katei ka doktor bad kumjuh ïa ka tnad ba dei peit ïa ka koit ka khiah jong ka Sorkar Jylla ba dei ban don da ki kyndon kiba biang khnang ba kum kine ki kam ba ktah ïa ka koit ka khiah kan ym jia shuh nang ne sha khmat.
