Shillong, Risaw 06
Ki nonghikai hapoh ka shatri jong ka Meghalaya SSA School Association (MSSASA) ha ka 06 tarik u Risaw 2025, ki la pynlong ïa ka jingïalang ban ïakynduh lang ha madan Malki.
Kane ka jingïakynduh lang baroh ki nonghikai SSA kadei halor ban pynsngew ïa kiba bun ki mat jingdawa jong ka seng bad kiwei-kiwei de ki mat, kiba na ka liang ki nongïalam ki la dep ban ïakren bad ka Sorkar Jylla.
La sakhi ba ha kane ka sngi ki nonghikai ki la ïa mih paidbah na ki district bapher-bapher.
Haba pynshai ïa ki mat jingdawa jong ka seng, u Bah Aristotle Rymbai, President u la pynshai halor ka jingpynmih hukum (order) ka Supreme Court (SC), ba baroh ki nonghikai ki donkam ban pass ïa ka Teacher’s Eligilibilty Test (TET), kaba la pyntreikam naduh ka 01 tarik u Nailur 2025, ki nonghikai ki la rai ban phah da ka ‘Review Petition’ lane ka jingkyrpad ban peitbniah biang ïa kane ka rai sha ka Supreme Court.
U Bah Aristotle u la ong ba ka Sorkar Jylla ka la pynurlong ïa ka jingkwah jong ki, ban pyllait noh ïa kito ki nonghikai kiba la trei hashwa ka 23 tarik u Nailar 2010, ba kim donkam shuh ban leh ïa ka MTET, hynrei ka Supreme Court pat mynta ka la pynmih pynban ïa ka hukum ba baroh ki nonghikai ki hap ban pass ïa ka TET lane kaba khot ha Meghalaya ka Meghalaya Eligibility Test, kaba la pynduh mynsiem biang ïa ki nonghikai.
“Ka Sorkar Jylla ruh ka hap ban ïatynjuh bad ka Supreme Court halor kane. Ka Association ruh ka la dep ban buh da ka jingthoh sha u Commissioner and Secretary ka tnad pule puthi, u Vijay Kumar Mantri, ban pynpaw ba ki kwah ban ïoh jingshai na ka Sorkar Jylla, ba ha kano ka nongrim ka ïeng halor kane ka rai ba la pynmih da ka SC, hynrei na ka liang jong u pat un sa khot ïa kren bad ka Association halor kane,” la ong u Bah Aristotle.
U la ong ba lada ki nonghikai ki sngap jar halor kane ka kam, ka Supreme Court kam tip ïa ki jingeh jong ki. “Kumta ban ïa kaba shong kli kti, ngin phah da ka ‘Review Petition’ bad kata ka jop ne rem ruh ngin sa ïa peit hadien, hynrei ngin ïakhun ïa ka hok, la bynrap shuh-shuh u Bah Aristotle. Ka Supreme Court ka ong shuh-shuh, ba baroh ki nonghikai kiba la hikai 20 snem ne 40 snem, ki hap beit ban pass ïa ka Teacher’s Eligibility Test, lym kumta yn weng kam ïa ki. Ka Supreme Court ka buh 2 snem ba baroh ki nonghikai ki dei ban pass ïa ka TET, kaba la treikam naduh ka 01 tarik u Nailur 2025 haduh ka 01 tarik u Nailur 2027.
Nalor kane ka mat ba kongsan, u Bah Aristotle u la pynsngew ruh ïa kiba bun ki mat ba ka seng ka la dawa na ka sorkar ban pynurlong noh.
U Bah Aristotle u la sngap ïa ka jingmynjur lang jong ki para nonghikai baroh, da kaba ïathuh ba ka tnad ka pule puthi ka la kular, ba ha kaba ïa dei bad ka kam ki nonghikai kan pyndep noh hapoh u bnai Risaw, da kaba phah sha ka Sorkar ïa ka Cabinet Memorandum, ba kin mynjur, kumta ki nonghikai ruh ki ïa mynjur lang halor kane.
Nalor kata, u ong ba lada ka Sorkar kam pyntrei noh ïa ki kam kumba ka la kular hapoh une u bnai Risaw, ki nonghikai kin sa pynlong da ka jingïakhih kaba kham tyngeh. Kumta ki nonghikai kin ïai shah shwa ha u ne u bnai Risaw, kumba ka Sorkar ka la kular bad lada kam pynurlong ïa ki jingdawa, ki la rai ban pynlong beit da ka jingïakhih kaba tyngeh.
Ki mat jingdawa jong ki nonghikai SSA ki long ban wanrah ïa ka bhah thungkam na ka bynta ka Job Security ne ban pynskhem ïa ki kum ki nonghikai SSA, ban long ki nongtrei ba pura, bad nangta ban pyntreikam ïa ka Pay Structure, ka rukom siew tulop na ka bynta ki nonghikai SSA.
