Shillong, Risaw 06
Uwei u nongñiah kali ryngkat bad uwei pat ki la phet krad bad ieh noh shadien ïa ka kali kaba la shong da ki saw ngut ki suba nong Bangladesh, hadien ba shah kthong ha ki pulit.
Katkum ka khubor kaba la ïoh na ki pulit la ong ba ha 3 tarik mynta u bnai, ha ka por kumba 5.30 mynstep, kawei ka kali kaba don ïa u registration number ML04-C-6694, ka la phet na ka jingkhynra jong ki Pulit ha lad Mawryngkneng By pass, East Khasi Hills bad phet noh bak.
La ong ba halor kane, ki Pulit ki la kthong nadien ïa katei ka kali bad kham hadien la lap ïa katei ka kali kaba la ieh noh ha surok Thangshalai By-pass (EKH). Hynrei u nongñiah jong kane ka kali ryngkat bad uwei u nongshong kali ki la phet krad bad iehnoh shadien ïa saw ngut ki briew kiba la suba ba ki dei ki nong Bangladesh kata u Yaming Shake (26 snem), ka Mabla Shake (25 snem) bad arngut ki khynnah shynrang ba dang rit ka rta.
