Shillong, Risaw 06
Ki runar bym lah ban ithuh durkhmat ki la ïoh ban tuh haduh khyndai tylli ki masi na ka jaka ri masi jong ka SPCA kaba don ha Wahmawria ha East Khasi Hills.
Katkum ka khubor kaba la ïoh na ki pulit la ong ba u In-charge jong ka AH & Veterinary Officer ka Pynursla C&RD Block (EKH) u la ujor ba ha ka 3 tarik mynta u bnai ha ka por kumba 12.30 shiteng synñia, ki runar ki la ïoh ban tuh ïa ki khyndai tylli ki masi na katei ka jaka ri masi.
La ong ba kham hadien, la lap bad ïoh kurup noh ïa ki ar tylli ki masi na kawei ka jaka kaba don marjan.
Ha kiwei pat ki khubor, u Gyana Shankar Chakma u la ujor ba ha ka 2 tarik mynta u bnai ha ka por kumba 1.30 mynstep, ki runar bym lah ban ithuh, ki la tuh ïa ka arshaka ka jong u kaba don ïa u registration number AS01-EY-1383 na Lumjingsuk, Shillong.
U Rakesh Neelam u la mudui da ka jingujor ba hapdeng ka 30 tarik u Nailur, 2025 bad ka 2 tarik u Risaw, 2025, ki runar bym lah ban ithuh ki la rung shapoh kawei ka quarter ne ka jaka sah kaba dang don hapdeng ka jingpynbha kaba don ha AG Quarter, Motinagar, Shillong, bad ha kaba ki la tuh ïa ki katto katne ki tiar pyndait ha ki kamra sum bad kiwei-kiwei, kiba shong dor kumba T.70,000/-. Ka Kong Rubina Phawa ka la mudui da ka ejahar ba ha ka miet jong ka 29 tarik u Nailur, 2025, ki runar bym lah ban ithuh, ki la leit ban rung jubor ha ka ïing sah jong ka ha Lawsohtun, Block-V, Shillong, bad ki la tuh ar tylli ki mobile phone, ka pisa T.40,000/-, bad kiwei-kiwei.
