Shillong, Risaw 09
U Chief Executive Member ka Khasi Hills Autonomous District Council (KHADC) u Bah Winston Tony Lyngdoh u la bate kam ïa ki Executive Member ba thymmai hapoh EC ba la ïalam da ka Voice of the People Party (VPP).
Kane ka lah wan shisngi hadien ba u Lat ka Jylla u Chandrashekhar H. Vijayashankar u la mynjur ïa ka kyrteng jong ki hynñiew ngut ki dkhot ka EC kiba kynthup lang ïa arngut ki kynthei.
U Bah Winston kum u CEM un khmih hi ïa ka General Administration, Appointment, Posting & Transfer, Establishment, Trade, Enforcement, Revenue Collection, Arts & Culture, Khasi Traditional Medicine Commission (KTMC) bad kiwei pat kiba khlem aiti ïa ki EM.
Ïa u Bah Powell Sohkhlet la bynshet ba un khmih ïa ka Land Development, Information & Technology katba ïa u Bah Seiborlang Warbah un khmih ïa ka Finance, Taxation bad Forest.
Ka Kong Aibandaplin F Lyngdoh kan khmih ïa ka Health & Sanitation, Solid Waste Management bad Education, katba ka Kong Deity H Majaw kan khmih ïa ka Law & Legal kynthup ruh ïa ka Implementation of Khasi Social Custom of Lineage Act and Rules, Constitutions of Courts, Marriage & Divorce bad ka Town Committees.
Haba ïadei kiwei pat ki dkhot ka EC, u Bah Isynei Hinge un khmih ïa ka Water Resources bad Fisheries, u Bah Pynkhrawboklin Kharjahrin un khmih ïa ka Council Building & Assets bad ruh ïa ki Building Bye laws bad u Bah Denzil Raynard Chen un khmih ïa ka Elaka Administration bad Markets.
Ban shu bynrap hangne ïa ka EC ba la ïalam da u Bah Winston Tony Lyngdoh la thaw hadien ka jinghiar shuki noh u CEM barim u Bah Shemborlang Rynjah na ka daw ba u don hapdeng ka jingbym koit bym khiah ha ka met.
