Shillong, Risaw 09
Ka Kong Bajoplin Kharmudai ka hynmen arkmie jong u heprit Kyrshanbor Kharmudai ka la ong ba ka jingshah pynïap u heprit Kyrshanbor kadei beit ka jingleh ki menshohnoh. Ka la ïathuh ruh ba ka met jong u heprit ka la mong lut bad ka jaka ba mynraiñ ruh ka la mong.
Haba kren sha ki lad pathai khubor, ka Kong Bajoplin ka la ïathuh ba katkum ka jingïohi ïa ka metïap jong u heprit Kyrshanbor, ka paw shai ba um shym la ïap suk, hynrei u ïap da ka jingïaksaid namar ba ki kti ki kjat kim shym la beit.
Haba kylli ka la ong, “Kum ka ïing ka sem kam don ka jingsuba sniew ba dei ka jingshah pynïap dusmon, namar ba u Paheh jong u heprit Kyrshanbor u bylla mynsngi bad bam da miet, bad um shym don daw ne ïa shrut badno-badno ruh ha shnong ha thaw, hynrei kane ka jingïap u heprit ka dei beit ka jingshah pynïap ha ki nongshohnoh”.
Ka la ïathuh ruh ba ka Kmie u heprit Kyrshanbor kan sa dap shi snem mynta u bnai Risaw, hynrei ka la jia noh kumne ba khlad noh sa u khun.
Halor ka jingjah u heprit Kyrshanbor ha ka 08 tarik na ïingsah, ka Kong Bajoplin ka la ong ba katkum ka jingïakren bad ka Meiheh ka la ïathuh ba u Kyrshanbor u dang ïalehkai bad ki para khynnah ha phyllaw ïing, bad ha kapor ba ka khot ïa u ban dihsha noh um don shuh ha ïing.
“Nyngkong ki dang mut ba u leit kai ha ïing ki para marjan bad namar ba kim shym la lap haduh ban da miet ki la pyntip noh mar-mar sha ka shnong, bad ha ka jingïawad la lap pat ïa ka metïap jong u na khlaw Mawpat” la ïathuh ka Kong Bajoplin.
Ka Kong Bajoplin ka la ïathuh ba ki don ki dak mong ha ka met u heprit Kyrshanbor, ha kaba u la mih snam na shyntur bad na shkor, ki syngkai ruh ki la mong lut, u budlum bad ha ki bynta jong ka jingmynraiñ ruh ki la mong lut. “U Kyrshanbor um shym ïap suk hynrei u da rah ka kti bad ka kjat,” ka la ong.
Nalor kata, ka la kyrpad jur ïa ki bor pulit ba kin shimkhia bad ban tohkit bha halor kane ka kam, khnang ba kine ki khunlung kin nym shah ñion beiñ haduh ban da shah shim ïa ka jingim.
