Shillong, Risaw 09
Ha ka janmiet jong ka sngi Palei, la lap ïa ka metïap jong kawei ka khynnah kaba dang 13 snem tang hadien katto katne kynta ba ka la jah haba ka la don ha ka lynti ban wan phai sha la ïing na skul.
Kane ka jingjia kaba long sa kawei na ki jingjia ba sngew shyrkhei, ka la jia ha kawei na ki shnong ha Ri-Bhoi District. Ym pat lah satia ban tip ïa ka daw tynrai halor ka jingïap jong kane ka khynnah bad dei tad ynda la dep tohkit bad leh postmortem yn sa lah ban shai.
Katkum ka khubor la ong ba kane ka khynnah ka dei kaba leit skul mynstep, ka skul kaba wai ha ka por 10 baje mynstep. La ong ba hadien ba la wai skul bad ha ka por kumba 10.30 eiei ka la ïakynduh ïa ka kmie kaba la phah leit shim tiar na ïing u Rangbah Shnong.
La ong ba ka sien ba khatduh ba la ïohi ïa kane ka khynnah da ki para shnong ka dei ha ka por kumba 11 baje eiei namar ka ïing ruh ka don hapdeng shnong.
Shuh shuh la ong ba hadien ka jingïoh jingtip ïa ka jingjah, ka jingïawad ïa kane ka khynnah da ka kmie bad ka ïing ka la long baroh shi sngi, hynrei hadien ba ym shym la lap, kata ha ka por 6 baje janmiet la pyntip noh sha ki nongïalam shnong bad hadien ba la pynbeit ban ïawad shnong, kaba ki la sdang ha ka por 7 baje eiei, tang hapoh 20 minit la lap noh ïa ka metïap jong kane ka khynnah na kawei ka jaka khlaw kaba don marjan bad ka shnong.
