Jowai, Risaw 09
Uwei u nongshong shnong jong ka shnong Tahpat hapoh West Karbi Anglong District, Assam ula duh ei ïala ka jingim katba bun ngut ki nongshong shnong Lapangap hapoh West Jaiñtia Hills District ki la mynsaw malu mala ha ka jingjia ïakynad khappud hapdeng ka shnong Tahpat bad shnong Lapangap ha ka sngi Palei.
Ka jingïakynad kaba mynta ka kynti, ka dei kaba la sdang kumba saw san bnai mynshwa haba ki nongshong shnong Tahpat ki la sdang lur ïa u lum jong ka Shnong Lapangap bad thung ïa ki tynrai dieng sandalwood ha utei u lum wat hapdeng ka jingpyrshah jur jong ka Darbar Shnong Lapangap bad ka jingtip jong ki bor pynïaid district jong baroh ar district.
Ha ka 25 tarik u bnai Jylliew 2025, ki nongshong shnong Lapangap ki la leit jynrat da ka bor ïa kitei ki tynrai dieng ha ka jingsynran jong ki pulit Meghalaya bad ha katei ka sngi ka la mih ka jingther maw da ki jri siat sim na ki nongshong shnong Tahpat.
Ki nongshong shnong Tahpat ki la byrngem ba kin pynthut ïa ka kam rep kam riang jong ki nongshong shnong Lapangap bad kumta ki nongshong shnong Lapangap kim ïoh lad satia ban leit peit ïa u kba ba ki la thung baroh shisnem lynter sha ki jaka markhap bad ka Tahpat.
Ki nongshong shnong Lapangap kiba don ïa ki lyngkha bad pynthor kba ki la hap ban mad ïa ki jingpynthut na ki nongshong shnong Tahpat namar katba ki dang ot kba ki nongshong shnong ka Tahpat ki la ther maw ïa ki da kaba siat da ki jri siat sim.
Hadien ba ka jingïalang ba la long ha ka 6 tarik mynta u bnai hapdeng ki nongïalam shnong Lapangap bad ki nongïalam shnong Tahpat ha ka jingdon ki bor pynïaid district jong baroh artylli ki district, kam shym seisoh namar ba ki nongïalam shnong Tahpat ki dawa ba dei ban ailad ïa ki ban thung dieng biang bad kin sa ai lad ïa ki nongshong shnong Lapangap ban ot suk ïa u kba.
Ha ka sngi ba bud kata haka 7 tarik Risaw, ka Dorbar Shnong Lapangap ha ka jingshong dorbar ka la aipor arsngi ïaka Sorkar Jylla ban pyrkhat halor ka jingbym ïohlad ki nongshong shnong ban ot kba.
Hynrei ha ka jingkutlad bad jingbym banse haka 9 tarik Risaw, kumba 300 ngut eiei ki nongshong shnong ka Lapangap ki la ïamih ban leit ot kba ha ki pynthor kiba don markhap bad ka shnong Tahpat, West Karbi Anglong hapdeng ka jingpahara ba la pynbiang da ka tnat pulit ka Meghalaya bad Assam.
Katba dang ïaid ka jingot kba, kumba 20 ngut eiei ki nongshong shnong ka Tahpat ki la sdang ban pynthut ïa katei ka jingot kba da kaba ther da ki jri siat sim ïa ki nong Lapangap bad ki pulit ka Assam kiba don ha katei ka jaka ki la beh ïa ki nong Tahpat hynrei ki khlem phet satia.
Hynrei hadien katto katne ba ki Karbi ki la siat shi siat jri ban pynthut ïa ki nong Lapangap, ki pulit ka Meghalaya ki la sdang ban pyndonkam da ki lyer pynsat khmat 4-5 sien sha ka liang ba don ki Karbi.
Hynrei kham hadien la wan poi ki heh pulit jong ka Assam ban ïakren bad hadien ki nong Karbi ruh kila leit phai mar shiteng katba ki nong Lapangap ruh ki sdang ïa ot biang ïa u kba.
Hynrei kyndit ki Karbi ki la hiar biang sha Pynthor da ka jingthmu ban ker kut ïa ki pulit, ha kaba ki nongshong shnong ka Lapangap ki la leit mareh bran-bran ban ïarap ïa ki pulit Meghalaya.
Hynrei kham shiphang ki pulit ka Assam ruh kila sdang ban kawang lyer pynsat khmat sha ka liang ba don ki pulit bad Magistrate jong ka Meghalaya.
Kumta ki pulit bad Magistrate ki la mih noh na katei ka jaka ïakajia bad leitphai sha shnong Lapangap bad ha kata ka por ki pulit Assam kiba don ha katei ka jaka ki la khanglad ïa ki nong Tahpat ban nym tur sha Lapangap.
Hynrei syndet -syndet ki pulit Assam kiba pynsangeh ïaki nongshong shnong Tahpat ban nym leit sha Lapangap, ki la mih noh kynsan bad leit sha ka Camp ki pulit Assam kaba don haka jaka bala thung ïa u sandalwood.
Hadien katto katne por ki nongshong shnong Tahpat kiba don kumba 200 tam ki la wan beh thong biang ïa ki nongshong shnong Lapangap kiba don marshiliang u lum.
Khambun ki nongshong shnong Lapangap ki la phet shakhmat hynrei don katto katne kiba la sangeh bad ai reng ïa kitei ki nongshong shnong Tahpat khnang ban ïada ïa la ki nongshong shnong bad ïaka shnong ka thaw.
Ha katei ka jingïa aireng mar kylliang uwei u nongshong shnong ka Tahpat uba la tip kyrteng kum u Orivel Timung ula duh ei ïala ka jingim katba katto katne ki nongshong shnong Tahpat ki la mynsaw malu mala.
Khnang ban pynthikna ban pynneh ïa ka shongsuk shongshngaiñ bad ban tem ïa ka jingïakynad kaba lah ban nangjur, na ka liang u Deputy Commissioner jong ka West Jaiñtia Hills District ula pyntreikam da ka Section 163 BNSS da kaba pynjari da ka korphiw miet naduh 6:00 baje janmiet haduh 10:00 baje mynstep ha thaiñ khappud jong ka shnong Lapangap, West Jaiñtia Hills District.
