Nongpoh, Risaw 09
Ha ka jingtalasi kali kaba kham pher bad ka bym ju kham da ïohi koit, u Deputy Commissioner (DC) ka Ri Bhoi, u Abhilash Baranwal u la wan mih ha surok ban khmih bad sakhi hi dalade ïa ka jingbteng jong ki pulit ka Ri Bhoi ban talasi ïa ki kali kiba pynkheiñ aiñ ha ka surokbah National Highway 6 kaba la pynlong ha ka sngi Palei naduh ka por 4 baje janmiet tad haduh ka por 9 baje mynmiet.
Ka jingïadon ryngkat jong u DC ban ai ïa ka jingïatreilang ha ryngkat ki pulit bad ki briew ka tnat Transport, ka pyni ïa ka jingdon jong ka mynsiem ïatreilang ryngkat ban wanrah ïa ka jingshngaiñ na ka bynta ki paidbah nongleit nongwan bad ruh ban pynduna ïa ki jingjia tyngkhuh kali, kiba wanrah bunsien ïa ki jingjia ba sngewsih.
Kum ban shu kdew, dang ha ka sngi Ba-ar, ki pulit ka Ri Bhoi ha ka jingpynlong ïa ka jingtalasi kali kaba neh haduh san kynta, ki la ïoh ban talasi palat 2500 tylli ki kali bad ïoh ban daiñ kuna haduh T.8 lak na ki 200 tam tylli ki kali kiba pynkheiñ ïa ki aiñ ñiah kali bapher-bapher kiba kynthup naduh ka jingñiah kali haba shoh khawiang, ka jingpyndait ïa ki light LED, ka jingpynher sted bad kiwei-kiwei.
Haba kren sha ki lad pathai khubor, u DC Abhilash Baranwal, u la ïathuh ba wat lada ïa kum kine ki jingtalasi la pynlong naka por shaka por, hynrei kaei kaba la pynlong ïa u ban wan ïadon ryngkat, kadei halor ka jingsngew ba ma u ruh kum u Chairman jong ka District Road Safety Committee, u la sngewdei ba ka ophis u DC ka dei ban ïadon ryngkat ha kum kine ki jingtalasi ban long ka nuksa na ka bynta ban pynthikna ïaka jingbud ryntih ïa ki kyndon aiñ ñiah kali bad ruh ban pynthikna ba ka surok ka long kaba shngaiñ na ka bynta ki paidbah nongleit nongwan bad ïada na ka bynta ka jingduh jong ki mynsiem briew.
Ha kane ka jingtalasi, la ïohi ba ki bor pulit khlem jingmap, ki la daiñ kuna ïa baroh ki kali kiba pynkheiñ aiñ, kynthup ruh ïa ka kali jong ka Meghalaya High Court kaba don ïa u registration number ML05-AB-3209 kaba la pynpah sairen bad pynmeh ïa ki light rong blue bad rong saw khlem ka jingdon ryngkat jong uta u heh u hain ne u VIP. Ki bor pulit ki la law noh ïa ka sairen bad daiñ kuna ïa katei ka kali kumba long lem ïa kiwei de ki kali.
U Senior Superintendent of Police ka Ri Bhoi, u Vivekanand Singh Rathore uba la lam khmat ïa ka jingtalasi, u la ïathuh ba ka jing -bteng ki pulit ban pynlong ïa kine jingtalasi kadei halor ka jingïoh jingmut na kiba bun ki paidbah kiba ai jingïaroh bad kwah ba kane ka kam kan ïai bteng, kaba ma u, ruh u sngew ïahap.
“Mynta ka sngi, phi la ïohi ba wat u DC bad u DTO ki la wan ban don ryngkat bad ngi ban ai ïa ka kyrwoh kaba shai ba ym don uba kham khraw ïaka aiñ. Lada phi dei u nongñiah auto, u nongñiah trok ne wat u nongñiah ïa ki kali remdor, ka aiñ kan treikam beit kumjuh khlem jingleh shilliang,” la ong u Rathore.
U Rathore u la ïathuh ba ha ka jingtalasi kali ha kane ka sngi, palat 100 ngut ki pulit kila mih ban talasi kali bad baroh ar lain jong ka surokbah, kata ka lain kaba kiew sha Shillong bad ha ka liang kaba hiar sha Guwahati bad ba kum kine ki juh ki jingtalasi la pynlong ruh sha kiwei ki jaka ka Ri Bhoi ba kynthup naduh Rani Jirang, Patharkhmah, Khapmara, Khanapara, Byrnihat, Umsning, Umiam, and Umroi.
Utei u heh pulit ka Ri Bhoi u la buh ruh ka jingmaham kaba tyngeh ïa ki nongñiah kali ba kane kadei ka kyrwoh kaba shai ban ym pynkheiñ ïa ki aiñ ñiah kali, namar ka jingim ka long kaba kongsan na baroh kiei-kiei.
