Shillong, Risaw 09
Ïa ka metïap jong u heprit Kyrshanbor Kharmudai, ba dang 7 snem ka rta uba la jah ha ka janmiet jong ka 08 tarik u Risaw 2025, na ïingsah kaba don ha shnong Nongrah Lummarboh, la lap noh narud surok hajan ka khlaw kaba hap ha ka shnong Mawpat. Kane ka jinglap ïa u heprit Kyrshanbor kadei tang hapoh ka arphew saw kynta, hadien ka jingïa-wad jong ki nongshong shnong ka Nongrah.
Ïa ka metïap u heprit Kyrshanbor la lap na kawei ka jaka kaba la tip kum ka Lum Rumnong ha ka step jong ka sngi Palei, bad kane ka jaka kadei kaba don harud surok ka khlaw Mawpat ka lynti ban poi sha NEIGRIHMS, Hospital.
Halor kane ka jingjah jong u heprit Kyrshanbor na ka liang ki nongshnong shnong baroh bad ki bor pulit ki la pynlong ïa ka jingwad kaba bniah ha kylleng ki jaka naduh ka miet jong ka sngi bajah na ïing hynrei dei ha ka step kaba bud jong ka 09 tarik u Risaw 2025, la lap noh ïa ka metïap jong u na katei ka rud surok, ka khlaw Mawpat.
Hadien kane la wan poi noh ka kynhun Forensic Crime Unit ban pynlong ïa ka jingtohkit kaba bniah halor katei ka jingjia.
La sakhi ruh ba u Superintendent of Police, East Khasi Hills District, u Bah Vivek Syiem mar-mar u la wan poi sha katei ka jaka hadien ba la ïoh jingtip halor kane ban pynlong ka jingtohkit ïa katei ka jingjia.
Hadien ba na ka liang ka kynhun Forensic Crime Unit ka la dep ban peit bniah lut ïa ka jinglong jingman ka met u tei u heprit, la rah noh sha NEIGRIHMS, Hospital, ban pyndep ïa ka Post Mortem.
Haba kren sha ki lad pathai khubor u Bah Vivek Syiem u la pyntikna ba kane kadei ka jingshah pynïap bad la shu wan bret ha katei ka jaka bad ka jingtohkit mynta ka dang ïaid shakhmat.
U la ong ruh ba ki dak ki shin jong u heprit Kyrshanbor ki paw dei ba u shah pynïap, bad ka kaiphod Post Mortem kan sa batai shai ba kum kiei-kiei ki dak mong.
“Ki pulit ki la pynlong ruh ïa ka jingtohkit halor kane ka kam bad la ‘register case’ ruh, ngin sa ïa shong pyrkhat, namar kane ruh ka donkam ïa ka SIT, naba u dei u heprit uba la shah pynïap,” la ong u Bah Vivek.
U Bah Vivek u la ïathuh ruh ba ha ka jingtohkit ba malu mala ha katei ka jaka ba la lap ïa ka metïap u heprit Kyrshanbor, ka pyni ba ïa ka met la shu wan buh ha katei ka jaka.
Haba kylli, u Bah Vivek Syiem u la ong ba ka dang kloi palat ban ong ba ka don jingïadei bad ka ‘case’ shah pynïap i heprit Insaphira Lyngdoh Mawnai hynrei ki pulit kin tohkit lang ïa kane ka bynta.
Nalor kata, u ong, “ïa mynta ngam pat ïohi ba kan don jingïadei, hynrei ka jingtohkit kan ïaid shakhmat ban lap ïa kiei-kiei baroh”.
