Shillong, Risaw 09
Ka Hynñiewtrep Youth Council (HYC) Sengkmie, ka Federation of Khasi Jaiñtia and Garo People (FKJGP), Nongthymmai Circle bad ka Khasi Students Union (KSU) Nongthymmai Circle ki la phah ïa ka kyrwoh jingsngewlem sha ki bahaïing ha sem u heprit Kyrshanbor Kharmudai, ba dang 7 snem ka rta uba la jah na la ïing ha ka 8 tarik u Risaw bad la lap ïa ka metïap ba la shah pynïap dusmon bad leit bret ha Mawpat Lum Rumnong.
Na ka liang jong kine ki seng ki la pynrem jur ïa ki riew thrang snam ki bym don shuh ka mynsiem briew ban shim ïa ka mynsiem ba lui lui i heprit kumta ki la kyrpad jur ïa ka Sorkar bad na ka tnat pulit ba kin shimkhia halor kane ka jingshah pynïap dusmon ïa ki hep kiba rit.
Ha ka kyrwoh khubor, ka HYC ka la pynpaw ïa ka jingbitar halor katei ka jingjia, da kaba buh jingkylli ïa ka jinglah jong ka Sorkar ban pynthikna ïa ka jingshngaiñ ha ka Jylla.
“Ym dei ban shah ïa kum kine ki kam runar, bad ka dei ka kamram jong ka Sorkar bad ki bor ka aiñ ban ïada ïa ki nongshong shnong bad ban ïada na kum kine ki jingjia ba sngewsih,” la ong ka kyrwoh.
Ka HYC ka la buh katto katne ki jingkylli ha kaba ïadei bad ka bynta jong ka Sorkar ban pynthikna ïa ka jingshngaiñ da kaba kylli mano ban shim ïa ka jingkitkhlieh ïa kum kine ki jingjia bad ban pynthikna ba ka aiñ kan ïada ïa baroh ki nongshong shnong.
“Hato ka Sorkar bad ki pulit ruh ki don ka jingkitkhlieh ban noh synñiang sha ka jingkiew jong ki kam runar ha ka Jylla?” la kylli ka HYC.
Ka HYC ka la ban jur ba ka roi ka par ha ka Jylla kam don jingmut khlem ka jingshngaiñ. “Kaei kaba ngi donkam ka long ka jingshngaiñ bad ka dei ka kamram jong ka Sorkar Jylla ban pyndep ïa ka,” la ong ka HYC.
Ka HYC ka phah ruh ïa ka jingsngewlem sha kiba haïing hasem jong u heprit Kyrshanbor Kharmudai da kaba pynpaw ïa ka jingïasnohkti lang bad ki ha kum kane ka por kaba sngewsih.
Shuh shuh la ong ba kane ka dei ka sien kaba ar kaba la jia ha kajuh ka shnong ha Nongrah, kumta ka seng ka sngewkhia halor kane bad kyrpad ïa ka tnat pulit ba kin trei shitom katba lah bad kyrpad na ki paidbah ba kin ïa snoh kti lang baroh khnang ban ioh ïa ka hok kine ki ar ngut ki mynsiem ba kordor na Nongrah.
U Vice-President ka KSU Nongthymmai Circle u Bah Richard Mawkhiew u la ong ba ka jingshah pyniap u heprit ka long kaba i sangsot bad ha ka ka rta ba 7 snem u la shah pyniap da ka jingjynjar kumta u kyntu ïa ka tnat pulit ba lada lap tikna ïa kiba donkti ban pynïap ïa kine ki heprit dei ban siat pynïap beit ym dei ban rah ‘tian bishar namar kam don jingmyntoi.
