Shillong, Risaw 09
U Symbud Myntri Rangbah uba khmih ruh ïa ka tnat Kam Pohïing (Police) u Bah Prestone Tynsong u la ong ba la dep ban thaw ïa ka Special Investigation Team (SIT) ka ban tohkit halor ka jingshah pynïap jong u heprit ba dang 7 snem bad ai jingkular ruh ban kem kloi katba lah ïa ki briew kiba donkti ha kane ka kam.
“Hooid, ka SIT hapoh ka jingïalam jong u SP East Khasi Hills (la dep ban thaw) bad ka jingtohkit ka la ïaid shakhmat,” la ong u Bah Prestone haba kren sha ki lad pathai khubor ha ka sngi Palei.
“Nga ong ha phi ïa kawei ba ha ki khyndiat por ngin sa ïoh ban kem noh ïa kiba donkti bad ruh ban poi sha kaba kut jong kane ka kam kaba la wan jia,” la ai jingkular u Bah Prestone.
Ka metïap jong u heprit Kyrshanbor Kharmudai ba dang 7 snem, uba la jah na la ïing na Nongrah ha ka janmiet jong ka 8 tarik mynta u bnai, la lap noh ha ka step kaba bud narud surok ha khlaw Mawpat.
“Watla ngi dang ap ïa ka kaiphod jong ka post-mortem (hynrei katkum ki jingsdang jong ka jingtohkit) ka la pynpaw ba ka dei ka kam pynïap,” la ong u Bah Prestone haba pynpaw ruh ïa ka jingshaniah tylli ha ki pulit ba kin lah ban pyndep ïa ka jingtohkit bad kem ïa kiba donkti ha ka por kaba biang.
Haba kylli, u Symbud Myntri Rangbah u la ong, “Phim lah ban shu kynnoh ïa ka Sorkar. Haba don kino-kino ki jingjia, kiba bun ki briew ki kynnoh beit ïa ka Sorkar.”
U la ban jur ïa ka jingdonkam ban sumar bad phikir bha ïa la ki khun bad ban don jingtip ïa ki sawdong ba ki don ban khanglad ïa kum kine ki jingjia. “Ha nga marwei nga sngew ban ong ba kum ki kmie ki kpa ruh ki dei ban shimkhia ba balei bad kumno kin jah na la ïing,” u la ong.
Kumta u la ong,”Na ka liang ki kynhun pulit ki shimkhia bad pynthikna na ka bynta ba ka suk ka shngaiñ ki nongshong shnong jong ka Jylla kan don, hynrei haba don ki kam sniew kiba jia, nga sngew ba phim lah ban ong ba don ki jingduna tang namar jong ka kynhun pulit.”
Kumta u la kyntu ïa ki kmie ki kpa ruh ba baroh ki dei ban da husiar bad sumar bha ïa ki khun ki kti.
