Shillong, Risaw 12
U Symbud Myntri Rangbah ka Jylla ba peit ïa ka tnad pynroi sor, u Bah Sniawbhalang Dhar u la pynpaw ba ka jingpynkynriah ïa ki nongdie madan sha kiwei pat ki jaka ka dang ïaid mynta, bad na ka liang ka Sorkar ka dang trei minot ha ka ban pynithuh ïa ki jaka kiba biang tam.
Haba kren sha ki lad pathai khubor ha ka Sngi Thohdieng, u Bah Dhar u la ong ba ka jingpynkynriah ïa ki nongdie madan na ki jaka kum ka Laitumkhrah, GS Road, bad kiwei-kiwei yn sa leh hynrei kane kan shim por.
“Kan shim por namarba ngam lah ban shu bret ïa ki briew jong nga ha surok. Nga hap ban wad jaka na ka bynta jong ki, buh ïa ki ha ka jaka kaba biang, bad baroh kan long kaba ïaid beit,” u la pyntikna da kaba bynrap ba ka Sorkar ka dang trei ha ka ban wad ïa ki lad jingpynbeit kiba biang tam.
Haba kylli halor ka mat ba la pynsngew da ki nongdie madan ha ka thaiñ Khyndailad, u Bah Dhar u la ban jur ba ka jingai ïa ki syrnot CoV kan long beit thik katkum ki kot ki sla kiba dei hok bad ba shisha.
“Ka jingai ïa ka CoV ka dei ban long kaba shisha. Kata ka dei ka kyndon na ka bynta jong ka,” u la ong bad bynrap ba ki ophisar ki pynlong ïa ki jingïalang man ka por ban saphriang ïa ka jingpynsngewthuh paidbah kumjuh ban pynshlur ïa ki briew ban pynbiang ïa ki kot ki sla kiba dei hok.
U Symbud Myntri Rangbah u la pynpaw ïa ka jingsngewnguh ïa ki paidbah jong ka Jylla kiba la ai ka jingïatreilang bad ka Sorkar halor kane ka bynta, da kaba kubur ba ka dei ka kam kaba eh.
“Kane ka kam, kam long kaba suk, hynrei nga ai khublei ïa ki paidbah ka Jylla kiba la ïatreilang bad ngi,” u la ong.
