Shillong, Naiwieng 02
U Myntri ka Sorkar Pdeng ba khmih ïa ka tnat DoNER u Jyotiraditya Scindia u la pynpaw ïa ka jingshoh biej haba ïohi ïa ki jingkieng ‘Diengjri’ jong ka Meghalaya bad ong ba “dei ka jingïohi pat ïa ka mynnor” bad ka dak ka jingïajan hapdeng ki briew bad ka mariang kaba hap ban tyngkai bad ïada.
Ka jingshoh biej jong u Scindia ïa ki jingkieng diengjri ka dei hadien ba ha ka sngi Saitjaiñ, u la leit ban jngoh ïa kawei na ki jingkieng diengjri ba jrong tam ha ka shnong Rangthylliang kaba don marjan ka East Khasi Hills District bad hangne u la ïoh ban ïakren bad ki trai shnong lem bad ki riewtynmen ka shnong kiba la ïada bad pynneh pynsah ïa kine ki jingshna ba phylla jong ka mariang kiba la neh da ki spah snem.
U Scindia ha ryngkat ki kynhun ïada ïa ki jingkieng diengjri lem bad u guide Morningstar Khongthaw, nalor kiwei kiwei, kila pynlut katto katne por halor jong kine ki jingkieng diengjri, kiba jrong da ki spah phut na madan.
“Haba phi wan shane, ka ïalam biang ïa phi ban ïohi ïa ka por jong ka mynnor, ka jingitynnad bad jingsuk jong ka Mei Mariang, ka jingstad jong ka katba ka dang khum ïa ki kti jong ka sawdong ka pyrthei bad ka ai ka lynti ïa ngi ki briew ban ïakynduh bad pynïasoh,” ong u Scindia ha ka video kaba u la pynmih ha ka Instagram ha ka Sngi U Blei.
U la batai ïa ki jingkieng ba shna na ka mariang kum ka jingpynpaw ïa ka jingïadei kaba jylliew hapdeng ki briew bad ka mariang jong ki, da kaba ong, “Ka jingitynnad jong ka Mei Mariang, ka long kaei kaei kaba ngi, kum ki briew, kum ki nong India bad kum ki briew jong ka Meghalaya ngi dei ban ñiew kor bad mane namar ba ka long ka nongïada bad nongpynbiang ïa ngi.”
Haba ñiew ïa ka jingleit jong u kum “ka jingshem kaba sngewtynnad”, u Myntri u la ong ba u sngewrit ban don “ha ka pneh jong ka khyndew ka Meghalaya bad ki tynrai kiba la kha ïa ki pateng jong ki briew kiba ïajan bad ka mariang.”
U Scindia u la ïaroh ruh ïa ki jingnoh synñiang jong ka Living Roots Foundation, ba la ïalam da u Bah Morningstar Khongthaw, kaba ka kam jong ka, ka long ban pynneh pynsah, ban ïada, bad ban ai pateng ïa ka jingnang jingstad tynrai haba ïadei bad ka jingshna ïa ki jingkieng diengjri sha ki pateng ban wan jong ki jaidbynriew riewlum kiba shong basah harud ki lum ba shathie jong ka Ri Khasi.
U Bah Khongthaw, uba la ïakren bad u Scindia ha katei ka jingleit jngoh, u la ong, “Nga sngewkmen ba nga la ïoh ïa ka lad ban ïakren markhmat bad u Myntri ka Sorkar Pdeng ba khmih ïa ka DoNER. Nga la kyntu ïa ka Sorkar Pdeng lyngba u Myntri ban pynpaw pyrthei ïa kine ki jingshna ba phylla jong ka Meghalaya. Ngi donkam ban pynneh pynsah ïa ki jingkieng.”
U Scindia u la wan sha Meghalaya kum shibynta na ka jingwan ïuhkjat ba arsngi ha kaba u la leit buh ïa u mawnongrim ban tei ïa ka project Sohra Circuit ba T.233 klur hapoh ka Prime Minister’s Development Initiative for North East Region (PM-DevINE) scheme ha ka sngi Saitjaiñ.
Kane ka project ka thmu ban pynkhlaiñ ïa ki jingtei jong ki kam jngohkai bad ban ai ka lad kamai jakpoh ka ban neh shirta ha Sohra.
Lah ban kdew ba dang ha ki khyndiat bnai bala leit, ka Myntri Pla tyngka ka Ri ka Nirmala Sitharaman ruh kala leit ban jurip ïa ki jingkieng diengjri ha ka thaiñ Sohra bad ïaroh ïa ka jingstad jong ki trai shnong ban shna ïa ki jingkieng bad ruh ka jingtrei shitrhem jong ki shnong ban ïada ïa ka spah mariang bala ai pateng ha Meghalaya.
