Shillong, Naiwieng 02
Ha baroh shi tyllup ka pyrthei ka Balang Katholik bad ka la pynlong ïa ka jingkynmaw burom ïa ka “All souls Day” kaba la ju rakhe man la u snem ha ka 2 tarik u Naiwieng kum ka sngi kynmaw burom ïa baroh ki ba lah khlad noh na kane ka pyrthei.
Ha ka Sngi u Blei ka 2 tarik u Naiwieng 2025 ki riewngeit jong ka Balang Kothalik na kylleng ka nongbah Shillong ki la leit ban kynmaw ïeid, ban buh syntiew, thang mombati ha ki jingtep jong ki baïeid bathoiñ jong ki ha u lumjingtep jong ka Balang Kothalik ha Laitumkhrah bad kumjuh ruh ha kylleng kiwei pat ki lum jingtep.
Ïa ka jinglehñiam Mass Bakhuid la tyrwa da u Archbishop Victor Lyngdoh, u Archbishop ka Jyllañiambah Shillong, ryngkat u Fr. Sebastian Rester Malngiang uba dei u Parish Priest ka Cathedral Parish, Fr. Julius Kurbah bad kiwei pat ki Lyngdoh, ki riewñiam bad da ki hajar ngut ki paid riewngeit ka Balang Katholik kiba la wan ban shim bynta ha kane ka Mass Bakhuid.
Ha ka Mass Bakhuid, u Archbishop Victor Lyngdoh u la pynkynmaw ïa ka jingdonkam jong ki ba ha ïing ha sem, ki lok ki jor ban kynmaw burom ïa la ki baïeid bathoiñ, kiba la khlad noh na kane ka pyrthei lyngba ka jingduwai jong ki.
U Archbishop ha ka jingïathuhkhana u la ong, ba iwei pa iwei kiba dang im ha kane ka sla pyrthei shisien ka sngi ngin sa khlad noh bad ngim tip lano kata ka por ka sngi kan wan, kumta ngi dei ban imbha, ban lehbha bad ka dei ka kamram jong ngi ban ïaid barabor ha ka lynti kaba dei, ban im haka hok, ban buh jingduwai bad ka jingriewblei.
Ha kane ka sngi, da ki hajar ngut ki paidriewngeit ka Balang Kothalik ki la hiar sha lumjingtep ha Laitumkhrah ban thang mombati bad ban buh syntiew ha ki jingtep jong ka baïeid bathoiñ jongki bad ban duwai kyrpang na ka bynta ka mynsiem jong ki. Ka jingleitbuh syntiew bad ka jingthang mombati ka long kum ka dak, ka jingkynmaw ïeid ïa la ki baïeid bathoiñ, kiba lah leit noh ha shwa bad ban buh jingduwai na ka bynta ka mynsiem jong ki ba kan ïoh ka jingjah thait ka ba bymjukut.
