Shillong, Naiwieng 02
Ka jingap khmih lynti ban ïoh ïa ka surok kaba da ki phew snem bad mynta ka la urlong da ka jingtrei shitom jong u MLA ka thaiñ, kata u Bah Adelbert Nongrum.
Ki nongshong shnong jong ka shnong Riatsamthiah bad Jaiaw Shyiap, ki la dap da ka jingkmen kaba khraw eh haba ki ïoh ïa ka khubor ba shen kin sa ïoh ïa ka surok kali kaba ki la ap khmih lynti mynta la da ki phew snem.
Haba kren ha ka jingïalang, u MLA ka North Shillong Konstitwensi, u Bah Adelbert Nongrum u la ong ba ka Sorkar ka la dep ban mang pisa ban shna ïa katei ka surok kali, ba kan long ka jingmyntoi ïa ki paidbah.
U Bah Adelbert u la ïathuh ruh ba ïa kane ka surok la mang pisa lyngba ka Grant in Aids na ka tnad Urban Affairs bad kaba la mang kumba T.1.20 klur bad shen ka kam kan sa treikam.
U la ong ruh ba ka burom baroh ka leit sha ki Dorbar Shnong jong ka Riatsamthiah bad Jaiaw Shyiap na ka jingïatrei lang bad ban pynlong ïa kane ka projek ba kan urlong.
U Bah Adelbert u la ong “Kum u MLA u dei u shakri u ban peit ïa ka jingeh bad jingdonkam ki paidbah bad ka dei ka kamram jong u ban shim khia lada ki paidbah ki donkam. Ki paidbah ki long halor bad ma u kum u nongmihkhmat u dei ban ai burom sha ki bad ban peit ïa kaei kaba ki thrang ban ïoh.”
Nalor kata, u la ai khublei ruh ïa u Symbud Myntri Rangbah ka Jylla, u Bah Sniawbhalang Dhar u ba la ai ka jingmynjur bad pynurlong ïa kaei kaba u la kyrpad na ka bynta ki paidbah.
“Watla u dei u dkhot u ba don ha ka liang pyrshah, hynrei ka jingkyrpad jong u, na ka bynta ka jingmyntoi ki paidbah ka la urlong mynta,” u la ong.
U la maham jur ruh ïa ki kontraktor ba ki dei ban trei bha bad ka jingtrei ka dei ban long kaba bit kaba biang.
U Bah Adelbert u la pynbna sa ar tylli ki projek na ka Infrastructure Development Scheme, kaba kine artylli ki projek ki kot haduh kumba T.3 klur tam ei-ei, kata ban shna ïa ka lynti ïaid kjat ha Wahingdoh bad ruh ban pynbha ïa ki Nala bad ki wei ki jingdonkam ha Riatsamthiah.
Na ka liang ki arngut ki rangbah shnong ki pynpaw ïa ka jingsngew kmen, ba u MLA u la wan rah ïa kine ki kam pynroi, bad ai khublei kyrpang ïa u, ïa ki kam kiba u la leh, ki don ka jingkyrmen ba kine ki kam pynroi kin long ka jingkyrkhu ïa ki nongshong shnong baroh.
