Mawkyrwat, Naiwieng 02
Ki pulit ka Ranikor ryngkat ka jingïatreilang bad ki pulit Special Cell jong ka Mawkyrwat ki la ïoh ban kem noh ïa 5 ngut kiba la suba ba ki dei ki dkhot ka seng kieng atiar ka Garo National Liberation Army Regroup (GNLA-R).
Katkum ka khubor na u Superintendent of Police (SP) jong ka South West Khasi Hills District u Bah B Jyrwa, u la ïathuh ba ha ka 28 tarik u Risaw, 2025, uwei u nongkhaïi u la ujor ejahar ha thanad Nonghyllam hadien ba u la ïoh pdiang ka shithi dawa pisa kaba T.5 lak tam ha ki briew kiba kam ba ki dei na ka seng kieng atiar Garo National Liberation Army Regroup (GNLA-R) bad nalor kane u la ïoh pdiang ruh ïa ka telephone call na u number bym ithuh, ha kaba u la shah byrngem.
Ha kaba ïadei bad katei ka jingjia ki pulit ka Ranikor ryngkat ki pulit Special Cell jong ka Mawkyrwat lyngba ki jingïoh jingtip kiba biang, ki la ïoh ban kem noh ïa uwei u briew uba la suba donkti ha katei ka kam ïa uba la tip kyrteng kum u Mann R Marak, 25 snem na ka shnong Upper Rajapara ha South West Khasi Hills.
Shuh shuh la ïathuh ba hadien ka jingtohkit, utei u briew u la phla ïa kiwei pat kiba donkti bad ki pulit ki la ïoh ban kem sa ïa saw ngut bakynthup ïa uwei u khynnah rit.
Kine kiba la shah kem ki long u Marson R Marak, 18 snem na Upper Rajapara, u Tartus N Marak, 20 snem na Mulapat, u Babulin D Sangma, 27 snem na Upper Rajapara bad kine baroh ki dei na South West Khasi Hills District.
Ha kaba ïadei bad kane, ki pulit haduh mynta ki dang pynlong ïa ka jingtohkit ban pynthikna la ki don jingïadei ne em bad ka GNLA-R.
Ki pulit ki la register ruh ka mukotduma ha thanad Nonghyllam halor ki kyndon aiñ no.15(10)25 U/S 308(2)/351(4)/3(5)/113(3)(5) BNS.
