Shillong, Naiwieng 03
Ha ka 29 tarik jong u bnai ba la lah, kawei ka kali Bolero Pick-up kaba la pynïeng ha Lumnongrim, la lap ba ka la jah khlem ka jingtip jong u trai kali.
Katkum ka khubor na ki pulit la ong ba u Bah Philinroy Bey u la shu ujor da ka ktien ba ha katei ka sngi ha ka por kumba 9.30 mynmiet, u la lap ba ka Bolero pick-up ka jong u, kaba don ïa u registration number ML10-D-4376 la lap ba ka la jah na ka jaka pynïeng ha Lumnongrim kaba hap hapoh ka thanad Umsning ha Ri-Bhoi.
Ha kawei pat ka khubor, u Kelbathson B Sangma u la ai ka jingujor ba ha ka 29 tarik jong u bnai ba la lah, ki runar bym lah ban ithuh ki la tuh ïa ka arshaka ka jong u, kaba don ïa u registration number ML08-J-5820 na shnong Chandishilla, Chibinang ha West Garo Hills.
Ha kawei pat ka khubor, u Vijay Pal Bheri u la ai ka jingujor ba ha ka 27 tarik jong u bnai ba la lah, ha ka por kumba 11 baje mynstep, lai ngut ki runar bym lah ban ithuh durkhmat ki la pyrshang ban tuh ïa ki 12 tylli ki pla kiba thep ïa ki tiar ilektrik na phyllaw jong ka ophis NECCON kaba don ha Shyamnagar, Phulbari ha West Garo Hills.
La ong ba ha kane ka por, uwei na ki nongtrei jong katei ka ophis u la ïaleh pyrshah ïa ki runar, ha kaba ki la phet krad bad ban ieh noh shadien ïa ka kali auto-rickshaw (AS18-AC-8387), kawei ka mobile phone bad ki tiar ki tar.
