Shillong, Naiwieng 03
Ka jingdheng kali ha Nongbah Shillong ka la jur bha ha kine ki sngi, la ka long hapdeng sor bad ha ki bynta jong ka Upper Shillong, bad ha kylleng ki jaka ha Shillong.
La sakhi ba ka jingjur ka dheng kali ka dei ha Upper Shillong bad ka surok Umshyrpi bad kane ka jingdheng kali ka la ktah shibun ïa ki kali ba leit ba wan, namar ki hap ban shong sahkut hajuh da ki bun-bun kynta.
Lah ban kdew ruh, ba kane ka jingdheng kali ka dei na ka daw ka jingpyntrei ïa ka surok 4-lane naduh surok Umshyrpi, Rilbong shaduh sha Upper Shillong.
Kane ka jingdheng kali, ka la pynsohsat ym tang ïa ki nongñiah kali hynrei wat ïa ki paidbah nongshong kali ruh namar ba ki hap ban shong da ki kynta, khamtam eh ynda la poi ha ki thaiñ 101 ter-ter shaduh sha Umshyrpi.
Haba pyrshang ban wad ïa ka daw ka jingdheng kali la sakhi ba naduh na Rilbong ka kham duna ka jingdheng kali, hynrei haba kiew shaduh Umshyrpi ter-ter ka la sdang ka jingdheng kali kaba jur bha, namar ki pulit pynïaid kali ki hap ban pynïaid ïa ki kali ha katei ka jaka namar ka dang don ha pdeng ka jingpyntrei.
Nalor ka jingbun ki kali, kaba kham jur shuh-shuh ban pynsah kut ïa ki kali hapdeng surok ka dei namar ba ka surok ka long kaba rit bad kaba la pynkhap ngiah shibun ïa ki kali ban ïaid.
Ka jingdheng kali ka jur bha ha ki por mynstep ha ki por ba baroh ki dang ïa beh ban leit buh skul bad ki nongtrei ha ki ophis bapher-bapher bad ruh ka jingdheng kali ka jur ruh ha ki por janmiet.
