Shillong, Naiwieng 03
U Myntri Sorkar bad MLA ka Amlarem, Bah Lahkmen Rymbui u la pynpaw ïa ka jingsngewkhia halor ka jingkylla jngut jong ka wah Umngot, kaba dei kawei na ki wah kaba la bna nam bha ha kylleng ka ri halor ka jinglong sngur bad ong “ka jingjngut ka wah Umngot ka dei ka jingduh ka kamai kajih jong ki paidbah”.
U Bah Lahkmen u la shim ba ka jingkylla jngut jong ka wah ka dei namar ka jingtheh khyndew jong ka kompani kaba pyntrei ïa ka surok Shillong-Dawki sharum jong ka thaiñ Laitlyngkot.
U Myntri u la ban jur ba kane ka wah ka long kaba kongsan bha ïa ka kam jngohkai bad ki trai shnong da kaba ong, “Ka wah Umngot ka dei kaba bna nam halor ka jinglong sngur ka um kaba la pynshoh biej ïa kiba bun ki nongwankai kiba ïashong lieng bad kumjuh ruh ïa kito kiba khwai dohkha.”
“Hynrei ha kine ki khyndiat taïew namar ka jingpynheh ïa ka surok ym hajan ka wah Umngot hynrei la shem ba sharum ka Laitlyngkot, ka don kawei ka wahduid kaba tuid sha wah Umngot, kumta, lada phi kynmaw bha ba ha kine ki khyndiat taïew ba la lah shuwa ka jingleh niam puja ne hapdeng ka puja, kala don ka jingtwa khyndew ha katei ka thaiñ bad imat ka kompani lane ki kontraktor kiba pyntrei ïa ka surok, kila theh ïa ka khyndew ha ka jaka ba marjan tang ban pynkhuid ïa ka surok bad imat kane ka khyndew kala tuid sha kane ka wahduid bad rong pat sha wah Umngot,” ong u Bah Lahkmen.
U la pyntip ruh ba u Symbud Myntri Rangbah ka Jylla Bah Prestone Tynsong u la dep ban bthah ïa ka kompani ba kan shim ïa ka sienjam ha ka ban tehlakam noh mardor ïa kane.
Lah ban pynkynmaw ba u Symbud Myntri Rangbah ba khmih ïa ka tnat PWD Bah Prestone Tynsong u la dep kren ïa ka kompani ban peit ba kumno kane ka wah Umngot kaba itynnad, kaba dei ka spah jong ka Jylla ha ka kam jngohkai, kan khuid biang. Ka Umngot ka dei kawei na ki jaka wankai, ka Shnongpdeng ka dei kawei ka jaka wankai, ka Dawki ka dei kawei ka jaka wankai ki nongjngoh pyrthei-namar kane, ki briew naduh Khanapara haduh Shillong haduh Umngot kila ïoh kamai.
Haba kylli, u Bah Lahkmen u la pynpaw ïa ka jingkhmih lynti ba ki bor Sorkar kin leh eiei lada ka kompani ka pynkheiñ ïa ki kyndon ba la buh ha ka Detailed Project Report (DPR).
“Shuwa ban shna ïa kano-kano ka DPR, ka Sorkar kala buh ïa ki kyndon ïada mariang bad kumta lada ka don kano-kano ka jingpynkheiñ ïa ki kyndon ka DPR, ka State Pollution Control Board lane ki bor ba dei khmih, ki hap ban leh eiei katkum ki kyndon jong ka aiñ,” u la ong.
