Mairang, Naiwieng 03
Ka District Magistrate jong ka Eastern West Khasi Hills lyngba ka kyndon aiñ 163 BNSS, 2023 ka la pynmih ïa ka hukum ban khang ïa baroh ki par maw beaiñ kiba pyntreikam khlem da ïoh jingbit na ki bor ba dei khmih kiba don ha ka shnong Markham village (Riat Mawlein) bad Urkohngoi.
Ka kyrwoh khubor na ka District Magistrate, ka ong ruh ba ka jingpynmih ïa kane ka hukum, ka dei hadien ka jingïoh jingtip ba ka don ka jingpyntreikam ïa ki par maw ne quarry khlem da ïoh jingbit ha ki bynta ka shnong Markham (Riat Mawlein) bad Urkohngoi.
Shuh shuh ka District Magistrate kala ong ruh ba kane ka la pynthut ïa ki paidbah, ka buh jingma ruh ïa ka jingim jong ki nongshong shnong, ka pynjot ïa ka mariang bad ka long ruh shi bynta ka jingpynkheiñ ïa ka aiñ ïada mariang.
Ka khubor ka ong ruh ba lada lap ïa kino-kino kiba ïaleh pyrshah bad pynkheiñ ïa kane ka kyndon aiñ kin ngat ha ka jingshah pynshitom katkum ka aiñ.
Shuh shuh na ka liang ka District Magistrate kala ong ruh ba kane ka aiñ kan treikam naduh mynta tat haduh ban da pynbna da kumwei pat.
