Shillong, Naiwieng 04
Ki nongkitkam jong ka Seng Khasi Kmie ki la pynpaw ba kim kwah ban kren kynthoh ïa kiba kwah ai jait kpa hynrei ka Seng Khasi kumba la seng naduh basdang kan pynskhem ban ai jait sha ka kmie ban pynskhem ïa ka kheiñ kur kheiñ kha.
Haba ïakren bad ki nongthoh khubor ha Seng Khasi College Shillong, ki nongkitkam kiba hakhmat naduh u Bah Paia Synrem, Assistant General Secretary, Bah Dipshon L Nongbri Vice President Seng Khasi Kmie ki la pynpaw ba naduh ba la seng ïa ka Seng Khasi, ka jingmut jingpyrkhat kaba shai haba ïadei bad ka kheiñ kur kheiñ kha.
Ki la ong ba ka jinghiar pateng ïa ka jait ka kynja ka hiar pateng na ka kmie bad ka seng kan dang pynskhem ban pynneh pynsah ïa kane.
Ki pynpaw ka jingsngewsih ban ïohi ba ha ka jaidbynriew ban mih ban ai jait sha u kpa.
Ki la ong ba man ka jaidbynriew ki don la ka jong ka jingkheiñ kyrpang namar don ki bym bam doh masi, bym bam doh sniang hynrei ka jinglong ba kyrpang ki Khasi ka dei ka kheiñ kur ka kheiñ kha.
Ki la ong biang ba lada don kiba pynbakla ïa kata, ka jinglong kyrpang jong ka jaidbynriew ka la duh noh.
