Shillong, Naiwieng 04
U Symbud Myntri Rangbah ka Jylla u Bah Sniawbhalang Dhar uba khmih ruh ïa ka tnat Transport u la ong ba ka Sorkar Jylla ka la shimkhia ban ïakren bad ki nongïalam jong ki kynhun bapher-bapher bad baroh kiba ïadon bynta ha kaba ïadei bad ka projek rel, da kaba thmu ban ïoh shim lang ïa kawei ka rai shwa ban ïaid shakhmat.
Haba ïakren bad ki nongthoh khubor ha ka sngi Ba-ar, u Bah Sniawbhalang u la ong ba ka jingïakren ka dang ïaid shakhmat bad ka Sorkar ka ïeng skhem ha ka nongrim ban pyndon bynta lang ïa baroh kiba donbynta ha ka kam ha kaba ïadei bad katei ka mat.
Shuh shuh u Symbud Myntri Rangbah u la ong, ka Sorkar ka donkam ban ïasyllok bad ki paidbah, ban sam ïa ki jingtip bad ban pynsngewthuh paidbah shaphang katei ka projek ban pynthikna ba baroh kin don lang ha kawei ka rynsan hashwa ban jam shakhmat bad bynrap ba kumta kan dang shim ïa ka por bad kam long kaba suk bha.
Ha kaba ïadei bad ka jinglong jwat jong kane ka projek, u Bah Sniawbhalang u la ong, “Tad haduh ba baroh kin don lang ha kajuh ka rynsan kan ym long satia kaba suk ïa ka Sorkar ban ïaid shakhmat bad katei ka projek kaba heh”.
