Shillong, Naiwieng 04
Ki samla pule ka skulbah NEHU kata ka NEHUSU ryngkat bad ka Khasi Student Union (KSU) NEHU unit ha ka 4 tarik u Naiwieng, 2025 ki la khang tala shi syndon ïa ka Administrative block ka skulbah NEHU ban pyrshah ha kaba ïadei bad ka jingïalang jong ka EC kaba la khot da u Prof. Prabha Shankar Shukla, uba dei Vice Chancellor ka NEHU ban pynlong ha nongbah Delhi ha ka 14 tarik Naiwieng, 2025.
U President ka NEHUSU u samla Menlamlynti Markhap u la ong, ki kynhun ka NEHUSU bad ka KSU NEHU Unit ka pyrshah ïa ka jingleh jong u VC bad ka kwah ban weng noh halor ka jingpynïaid ïa ka jingïalang ha nongbah Delhi.
Ka jingshim rai ka kynhun ka NEHUSU bad ka KSU ban khang tala ïa ka Administrative block ka dei namar kim lah ban ai jingpynshai ha kaba ïadei bad ka jingdawa ka seng ki samla pule ïa ka jingïalang ba la khot da u VC sha nongbah Delhi.
Shuh shuh u la ong ba katkum ka jingkular jong ka Ministry ban nym pynlong shuh ïa ka jingïalang hadien ka 30 tarik u Jymmang, 2025 bad ka long kum ka jingshah shet kylla jong ki samla pule lada ki pynlong ïa katei ka jingïalang.
Ki samla pule ki la ong ruh ba kin khang tala ïa ka Administrative block ka skulbah NEHU tad haduh ban da mih da kiwei ki rai.
