Shillong, Naiwieng 04
Ka Sorkar Jylla ka la mang T.45 klur, na ka bynta ban siang thymmai bad shna pynbha ïa ki surok kiba kongsan ha nongbah Shillong, kum ka jingbujli ha ka jaka jong ka projek ‘Smart Road’.
Ïa kane la pyntip da u Symbud Myntri Rangbah ka Jylla ba khmih ïa ka tnad Transport, Bah Sniawbhalang Dhar ha ka Sngi Ba-ar.
La khmih lynti ba ïa kane ka kam yn pyndep hapoh kane ka aïom trei kaba mynta, da ka jingthmu ban pynbha ïa ki jingtei jong ka nongbah, la ïathuh u Bah Dhar haba kren sha ki nongthoh khubor.
U Symbud Myntri Rangbah ka Jylla u la kdew ruh ïa ki lad ki lynti ban pynbha ïa ka leit ka wan ki paidbah ha nongbah Shillong, da kaba pynleit jingmut ban pynduna ïa ka jingdheng kali.
U Bah Dhar u la pynshong nongrim ïa ka jingdheng kali kum ka jingeh kaba khraw bad ong ba namar kane, ka Sorkar ka dang wanrah ïa ki jaka pynïeng kali kiba thymmai ban weng ïa katei ka jingeh.
Ha kajuh ka por, u la pyntip ba ka Sorkar ka thmu ban pynkynriah noh ïa ki ophis sha ka New Shillong Township.
“Kumta, hapoh 5-6 snem, ka sor thymmai ne ka ‘New Township’ ka dei ban long kaba la bit la biang bad ïa kiba bun na ki ophis barim yn sa pynkynriah noh sha katei ka liang bad ka jingdheng kali ruh kan sa duna (ha Shillong barim),” bynrap biang u Bah Dhar.
Ha kawei ka liang, ka Sorkar ka dang wad ïa ki lad ban pynïaid kali ha ka rukom jong ka ‘One-Way’ da kaba ïamir jingmut lang bad ki Rangbah Shnong.
Shuh shuh, u Symbud Myntri Rangbah u la kubur ba ka jingpynbeit ïa ka jingeh ha ka ïaid ka ïeng ki kali ka kynthup ïa ki tnad treikam bapher-bapher – ka tnad Transport, kam pohïing, pulit, bad ki bor pynïaid distrik, bad kular ruh ba ka Sorkar ka dang trei ban weng ïa katei ka jingeh.
