Shillong, Naiwieng 04
U Myntri ka tnad pule-puthi ka Sorkar Jylla, u Bah Lahkmen Rymbui u la ong ba ka Sorkar ka la kynshew pisa ha ka Mission I, II bad III bad thmu ban sdang sa ïa ka Mission IV, kaba thmu ban kyntiew kyrdan ïa ki ïingskul ha ki 15,000 tylli ki skul Elementary hapoh ka Jylla.
Haba kren sha ki lad pathai khubor ha ka 03 tarik u Naiwieng 2025, u Bah Lahkmen Rymbui u la ban jur ba ka Sorkar Jylla ka la pynleit jingmut bha ha ki kam ban pynbha ïa ki ïingskul.
U la ong ba kane ka dei ka Sorkar ba nyngkong kaba ithuh ba ki ïingskul ruh ki dei kiba don jingïadei bad ka rukom ai jinghikai ba paka ïa ki khynnah.
“Ka jingthmu jong ngi ka long ban ïohi ba baroh ki jingtei ba la pyndonkam ban hikai ïa ki khynnah ki dei ban long kiba paka bad kiba biang nadong shadong,” la ong u Bah Lahkmen Rymbui.
U la bynrap da kaba ong ba ka Sorkar ka don jingthmu ban kyntiew kyrdan ïa 150 tylli ki skul, kynthup 15 tylli hapoh ka ADB prokram bad maramot ïa palat 160 tylli ki skul.
Haba kylli halor ka jingpynbha ïa ki ïingskul ka dei ka kam kaba ïai bteng, na ka liang u Bah Lahkmen Rymbui u la ong “Kam dei ka jingkylli ïa 100 lane 1000 tylli ki skul, ka dei ka jingkylli ïa 15,000 tylli ki skul-ki skul shimet, skul Sorkar, skul ba ai jingïarap ka Sorkar, ki skul deficit bad kiwei-kiwei”.
