Shillong, Naiwieng 05
Ka long ka jingjia ka ban sah jingkynmaw ïa ka Hima Sohra bad ïa ka Bri u Hynniewtrep baroh kawei ba hadien 99 snem la sakhi biang ïa ka jinglehniam thang Syiem hapoh ka Hima Sohra.
La ong ba ha ka Hima Sohra, ka sien kaba khatduh ba ïoh ban pyndep ïa ka thang Syiem ba katkum ka niam ka rukom ka dei ha u snem 1926, kata ïa u Syiem Roba Sing Syiem ïa uba la thang ha ka Kpep ki Syiem ha Pomsohmen bad hadien jong kane ym shym la lah ban pyndep ïa ka niam ka rukom thang Syiem watla ka hima ka la ïoh bun pateng Syiem ruh namar kiwei ki daw kiba katkum ka niam ka rukom ka hima kim lah ban pyndep ïa ka niam ïap.
Ki khana tang ka long Syiem hapoh ka Hima Sohra ki ïathuh ba la jied ïa u Roba Sing Syiem u ba na ka ïing u Syiem Sohra bad kyntait noh ïa u Shondra Sing Syiem u ba dei na ka kpoh jong u Hajon Manik Syiem, hadien ba u Roba Sing Syiem u la long syiem u la thang ïa ka met basah jong u Ram Sing Syiem kaba sah 33 snem, kaba la pyndep ha ka 6 tarik u Lber 1908, u Roba Sing Syiem u la ïap ha ka snem 1918 bad hadien jong u la wan long syiem da u Joiñ Manik Syiem u khun jong ka Nehrimai Syiem u la mih bujli bad u la thang ïa ka met ba sah jong Roba Sing Syiem ha ka 29 tarik u Lber ha ka snem 1926 bad naduh kane ka por ka Hima Sohra ka khlem ïoh shuh ban pyndep ïa ka niam jingthang Syiem kaba kat kum ka niam ka rukom bad dei tad haduh ka 5 tarik u Naiwieng 2025 ka hima ka la ïoh biang ban pyndep ïa ka niam ka rukom ïa ka jingthang Syiem na ka jingkhlad noh u Syiem ka Hima Sohra u Freeman Sing Syiem.
La ong ba u Freeman u la bat kum u Acting Syiem naduh ka 15 tarik u Nailur 1981 bad na ka jingpynlong ïa ka jingjied Syiem ba pura ka la long ha ka 19 tarik u Jymmang 1983 ha ka jingïaleh ïa ka ilekshon u Païem Freeman u la jop da 46 ngut na ki 59 ngut bad u la synshar ïa ka Hima 44 snem tad haduh ba un khlad noh ha ka 31 tarik u Risaw 2025.
