Ka post mortem ka pyni ba shah pynïap, ka Forensic ka pyni ba pynïap hi

Shillong, Naiwieng 05

Kiba haïing hasem jong ki ar tylli ki longïing ki la sah ha ka umdum na ka jingkhlad iwei i heprit bad kawei ka longkmie ha Mawlai Mawiong Umjapung namar ka kaiphot post mortem ka pyni ba la shah pynïap bad ka kaiphot na ka Forensic ka pyni ba ki pynïap hi.

Kine ki ar ngut kiba la khlad, kawei ka longkmie kaba la tip kyrteng kum ka Kong Niancy Riahtam bad i heprit ba dang san snem ka rta ki dei kiba shong ba sah ha Mawiong Umjapung Dong Tariang-A kiba la jah ha ka 18 tarik Nailur, 2024 bad lap ïa ka metïap jong kine ar ngut ha ka sngi ba bud kaba dei ka 19 tarik Nailur, 2024 na ka wah ba pynïasoh ïa ka NEHU bad Mawiong.

Lada kheiñ naduh ba lap ïa ka metïap jong kine ki ar ngut ha ka 19 tarik Nailur, 2024 haduh mynta u bnai Naiwieng 2025 ka la long shi snem tam hynrei haduh mynta kiba haïing ki dang sah umdum namar kim shai ïa ka jingkhlad kine ki ar ngut.

Haba buddien ïa kane ka jingkhlad jong kine ki ar ngut, U Nongsaiñ Hima u la ïoh ban ïakren bad ka Meiieid jong i heprit ba san snem kaba sah ha Mawiong Umjapung, kaba la ïathuh ba kiba haïing hasem kin dang buddien ban lap ïa ka jingbishar kaba hok ïa ka jingshah pynïap ki ar ngut.

Ka la ïathuh kaba pynsah umdum ïa kiba haïing ka dei namar ka post mortem ka pyni ba shah pynïap katba ha ka Forensic ka pyni ba ki pynïap hi.

Kumta ka la kyntu ïa ki pulit ba kin shimkhia ban lap ïa ka jingshisha khnang ban pynhun ïa kiba haïing hasem.

“Nga sngew lyngngoh ba kumno kawei ka kaiphot ka batai da kawei, kawei ka batai da kawei namar ban ong ba ki pynïap hi ngin nym pdiang,” ka la ong.