Shillong, Naiwieng 05
Ki bor pynïaid district jong ka East Khasi Hills kila pynmih ïa ka hukum kaba khang ban pynlong ïa kino-kino ki jingïakhih ne Rally ha ka thaiñ Mawryngkneng da kaba pynpaw ïa ka jingsngewkhia halor ka jingsuk ïa ki paidbah bad ka jingdheng kali.
Ka District Magistrate Kong RM Kurbah kala pynmih ïa kane ka hukum hapoh ka kyndon 163 jong ka Bharatiya Nagarik Suraksha Sanhita (BNSS), hadien ka jingdon ka jingïalum paidbah da ka Meghalaya Commercial Truck Owners and Drivers Association (MCTODA), ban ïakhih bad ka jingkhang ïa ki trok kit dewbilat bad clinker.
Ka hukum kala mana tyngeh ïa kino-kino ki briew ne kynhun ban pynlong ïa ka jingïakhih ne Rally hapoh u pud ka Mawryngkneng C&RD Block. Kala mana tyngeh ruh ba ym dei ban rah ïa ki tiar pynmynsaw ne kino-kino ki kynja tiar kiba lah ban pyndonkam kum ki atiar kiba lah ban pynmynsaw ne buh jingma ïa kiwei ki briew pat.
Ka jingpynkheiñ ïa ka hukum kan khring sha ka jingshah pynngat ha ka kyndon 223 jong ka Bharatiya Nyaya Sanhita (BNS) bad kiwei-kiwei ki kyndon aiñ, kala ong. Kane ka hukum kan treikam noh mardor bad kan ïai treikam tad haduh ban da pynbna da kumwei pat.
