Shillong, Naiwieng 05
Ka jingshah kawang tear gas nalor ka jingshah tied bad shah bom ki nongïalam bad dkhot ka Meghalaya Commercial Truck Owners and Drivers Association (MCTODA) ha ka por shiteng synñia ka 5 tarik Naiwieng, 2025, ha ki pulit ka East Khasi Hills District, katba ki dang pynlong ïa ka jingïakhih ba jai jai ha Mawryngkneng, ka la pynlong ïa ka Dorbar Shnong Mawryngkneng nalor ka Synjuk ki nongñiah kali kamai ban pynrem jur halor kane ka jingleh ki pulit.
Ha ka jingïakren bad u Bah Peter J Lawai, Sordar ka Mawryngkneng, u la ong ba ka jingïakhih ka MCTODA naduh ba sdang ka long kaba jai jai, hynrei ka jingrung beaiñ ki pulit ha ka shnong khlem ka jingtip ka shnong ban leh ïa ki kam pyntriem, ban ai jingïada ïa ki mynder ri ka long kaei-kaei kaba hap ban pynrem jur.
Nalorkata, u la dawa ruh na ka Sorkar ba ka dei ban pynshitom ïa ki pulit kiba la pynklumar ha ka shnong ka thaw.
Na ka liang u samla Balajied Jyrwa, nongïalam ka synjuk, u la ong ba ki pulit ki pyni bor tang ha sor katba da poi sha khappud pat ki kylla long pynban kum kiba phong skirt bad kim don bor eiei.
