Shillong, Naiwieng 05
Ka Sorkar Jylla ka la pynsngew ïa ka jingbym lah jong ka ban pynurlong ïa ka jingdawa jong ka Meghalaya Commercial Truck Owners and Drivers Association (MCTODA) ban buh ïa kajuh ka dor shalan na bynta ki trok kit dewbilat bad ‘Clinker’ shabar u pud u sam jong ka Jylla Meghalaya.
Haba kren sha ki lad pathai khubor ha ka Sngi Balang, u Symbud Myntri Rangbah ka Jylla ba khmih ïa ka tnad Transport, u Bah Sniawbhalang Dhar u la pynshai ba watla ka Sorkar ka la pynbna ïa ki dor ki ban treikam hapoh ka Jylla, hynrei kam lah pat ban kner ïa kine ki dor sha kiwei pat ki Jylla, kum ha Assam.
Kane ka jingkren jong u ka long hadien ka rai jong ka MCTODA ban bteng ïa ka jingïakhih jong ka, kaba pynsangeh ïa ka jingshalan dewbilat bad ‘Clinker’.
Ka seng ka ïakhih halor ka jingïapher ka dor jong ka leit ka wan, da kaba kdew ba ka dor hapoh ka Jylla ka long T.9, katba shabar ka Jylla, ka hiar sha ka T.5, ka jingïapher kaba kim lah satia ban pdiang.
U Bah Dhar u la pynpaw ba ki don katto-katne ki seng kiba la dawa na ka karkhana pynmih dewbilat ban siew ïa ka dor ba la pynbna da ka Sorkar, ïa kaba ka karkhana ka la dep ban kohnguh ïa kane.
Katkum ka jingong u Bah Dhar, ar tylli ki seng na East Jaiñtia bad West Jaiñtia Hills ki ïatrei lang bad katei ka karkhana pynmih dewbilat, hadien ba la pdiang ïa ki dor ba la pynbna da ka Sorkar. Hynrei ka MCTODA ka dawa ba ïa kajuh ka dor dei ban pyntreikam shabar u pud u sam jong ka Meghalaya – ka bym lah ban leh namarba ka hap shabar ka jingkhmih jong ka Jylla.
U Bah Dhar u la pyntip ruh ba ki dor ba la pynbna da ka Sorkar hapoh ka Jylla: T. 11/- shi metrik ton ha shi kilomitar na bynta ki surok siang rong, T.12/- shi metrik ton ha ka shi kilomitar na bynta ki surok siang maw, bad T.14/- shi metrik ton ha ka shi kilomitar na bynta ki surok ‘Kutcha’. Ka karkhana pynmih dewbilat ka la pyntreikam ïa kine ki dor, u la bynrap.
Haba kylli, u Symbud Myntri Rangbah u la ong, “…ka Sorkar Jylla kam lah ban pynbna ne buh ïa ki dor na ka bynta kiwei pat ki Jylla, kum ka Assam.”
Na ka liang u Bah Dhar u khot ïakren ïa ki seng ban ïakynduh ïa u kum u Myntri ka tnad Transport, hynrei u la ban jur ba katei ka mat ka dei ka kam khaïi hapdeng ka karkhana pynmih dewbilat bad ki nongkit mar.
“Kane ka dei ka kam hapdeng ki karkhana pynmih dewbilat bad ki nongkit mar bad kam dei satia ka kam jong ka Sorkar”, u la pynpaw.
Haba ïadei bad ka jingjia kaba la jia ha Mawryngkneng, u Bah Dhar u la pyntikna ba ki don 2-3 ngut ki briew kiba la shah kem, bad ki pulit kin sa ïaid shakhmat bad ka jingtohkit bad leh ïa kaba donkam.
