Shillong, Naiwieng 07
Hadien ka jingshah bom shah shoh ïa ki dkhot jong ka Meghalaya Commercial Truck Owners and Drivers Association (MCTODA) ha ki bor pulit, ba kynnoh ba ki khang lynti ïa ki trok kit mar kaba la jia ha ka 05 tarik u Naiwieng 2025, ha Mawryngkneng, ka la pynlong ïa ka Hynñiewtrep Integrated Territorial Organization (HITO) hapoh ka jingïalam u President rangbah, Bah Donbok Dkhar ban leit hiar sha Mawryngkneng ban leit ai mynsiem bad ai ka jingkyrshan ïa ki.
Haba kren sha ki lad pathai khubor ha ka sngi Thohdieng jong ka taïew, u Bah Donbok u la ong ba kane ka jingbom ki pulit ïa ki nongñiah trok dei beit ka jingbthah jong ka Sorkar.
U la ong ba ki pulit ki la kem ruh ïa ki nongïalam da kaba kynnoh ba ki la pynsangeh ïa ki kali bad pynsah kut lut ïa ka ïaid ka ïeng, da kaba buh jingkylli ruh ba kito kiba shong scooty khlem phong helmet, hato ki la dep siew ne-em ïa ka bai kuna?
“Lada kim pyllait ïa kine ki nongïalam ba la shah kem, ngin sa leit ban ïakhih ha ïing lajong kata ha Secretariat,” la ong u Bah Donbok.
U la ong ruh ba teng-teng para briew ym ju ïa itynnad hynrei haba ka jaitbynriew ka dawa, hap ban ïa mih lang bad kata ka dei ka mynsiem ieid jaitbynriew. “Ka la mih ka kyntien kaba kren ba balei haba dei ba ïakhih ha Jaintia ki wan ïakhih sha Khasi Hills? Lada phim pyllait ïa kine ki nongïalam jong ka MCTODA, ngim banse ban leit ïakhih syndon ha Secretariat,” u la bynrap.
Kumta u ong “Ngi buh ha ka jingstad jong ki dkhot ka MCTODA ba kin dawa pyllait noh ïa ki nongïalam kiba la shah kem, khlem da buh kyndon namar ba kim shym leh be-aiñ.
