Shillong, Naiwieng 07
Ka Jaiñtia National Council ka la kyntu ïa ki District Council ba, ki la dei ka por ban pyntreikam pura noh ïa aiñ Trade by Non-tribal Act ban ïada na ka jingïoh laitluid ki kompeni bad kaba la ktah ïa ka kamai kajih ki trai muluk.
U Bah Sambormi Lyngdoh President ka JNC u la pynpaw ba ka seng ka la ïoh ban ïa kren sngewthuh jingmut bad ki nongïalam ka Meghalaya Truck Owners and Drivers Association haba ïadei ki mat ba katei ka seng ka pynlong ïa ka jingïakhih.
U la ong ba ha ka jingïakren bad ki nongïalam ka MCTODA, ki la ïathuh ba ka Sorkar ka la ai ïa ka dor kit jong ki kali sha ki kompeni hynrei ki khlem pyntreikam satia namar kata ka daw ba kane ka Association ka pynlong ïa ka jingïakhih ban dawa katkum ka dor ba la buh da ka Sorkar.
U Bah Sambormi u la ong ba, ki nongñiah trok bad trai trok na ka por sha ka por ki ju pynlong ïa ka jingïakhih ha ki por ba la dep haba ïadei bad ki jingeh jong ki hynrei ka Sorkar kam shym la shimkhia ban sngew ban sngap ïa ka jingeh jong ki.
Shuh-shuh u la ong kawei na ki daw bah ka jingkynduh jingeh ki nongñiah trok bad ki trai trok ka dei namar ka jingailad ki bor District Council ïa ki kompeni ba kin buh hi ïa ki trok bad ban kit hi ïa ki mar ki mata jong ki.
Halor kane u la ong ba ka ladei ka por ba ki bor District Council ki la dei ban pyntreikam pura noh ïa ka bor jong ki District Council haba ïadei bad ki kam khaïi pateng, kata ban pyntreikam noh ïa ka aiñ “Trade by Non-tribal Act” kaba dei ka aiñ ban tehlakam ïa ka jingleh mon ki kompeni.
U la ong, kumba ka long mynta ka Star Cement, Amrit, Topcem ki don kumba lai spah tam ki trok ban kit ïa ki mar ki mata jong ki bad da ka jingbun ki trok jong ki kompeni ka la ktah jur ïa ki trai trok bad ki nongñiah trok ba napoh ka Jylla.
Kumta u la kyntu ïa ka Sorkar bad ki bor District Council ban nym ailad shuh ïa ki kompeni ba kin buh bun tylli ïa ki trok kit mar khnang ba kan long ka jingïarap ïa ki nongñiah bad trai trok ba napoh ka Jylla.
