Shillong, Naiwieng 07
Ka Meghalaya Commer-cial Truck Owners and Drivers Association (MCTODA) ha ka 07 tarik u Naiwieng 2025, ka la rai ban bteng beit ïa ka jingïakhih tad haduh ba ka Sorkar kan pyllait ïa ki nongïalam ba shah kem ha ka miet ka 05 tarik u Naiwieng 2025.
Kane ka rai ka wan wat hapdeng ka jingkhot ïakren ka Sorkar ha ka jingpynïaid da u Symbud Myntri Rangbah uba khmih ïa ka tnad Transport, Bah Sniaw-bhalang Dhar ha ka jingdonlang ki Deputy Commissioner (DC) bad Superintendent of Police (SP) jong ka East bad West Jaiñtia Hills.
Haba pynbna ïa kane ka rai ban nym sangeh ïa ka jingïakhih, u dkhot ka MCTODA u Bah Lumla-ng Mawnai u la ong ba watla ka Sorkar ka la kular ban shimkhia halor ki mat jingdawa ka Association kynthup ban pyllait ïa ki dkhot, ka MCTODA kam pat lah ban shim rai ei-ei halor ka jingïakhih.
U Bah Lumlang u la ong ba ïa ka rai ba khatduh yn shim hadien ba la pyllait ïa ki nongïalam kynthup u President ka MCTODA namar tang para dkhot kim lah ban shim ka rai.
U la ïathuh ruh ba ha ka jingïalang ba la pynïaid da u Symbud Myntri Rangbah, u Bah Sniawbhalang Dhar, ka MCTODA ka la pynsngew ïa ki mat jingdawa bad ka la dawa ruh ba ka Sorkar kadei ban pyllait noh ïa ki nongïalam ka Association khlem da pynngat kyndon ïa ki.
“Haka jingïalang ngi la kyrpad ïa ka Sorkar ban pyllait noh ïa ki nongïalam jong ngi bad na ka liang ka Sorkar ka la kyrpad ruh ba ngin weng noh ïa ka jingïakhih bad ka Sorkar kan pyrkhat halor ki mat jingdawa jong ka MCTODA, hynrei mynta hadien ba ngi la ïakren bad ki dkhot ka Association bad ngi la sngewthuh ba ngim lah ban rai tang ma ngi. Ngin ap beit haduh ka 10 tarik Naiwieng lada lait jamin ki nongïalam bad dei hangta ngin sa shim ïa ka rai, ban weng ne bteng beit ïa ka jingïakhih,” la ong u Bah Lumlang.
Haba kylli halor ka jingsiew jong ki Cement Factory ïa ka bai kit sha ki trok kumba la kam da ki karkhana dewbilat ba ki bud ïa ka dor ba la bthah da ka Sorkar, ki dkhot ka MCTODA ki la kyntait ban jubab ei-ei, da kaba ong ba kim pat don nongïalam mynta ban jubab halor kata ka bynta.
