Shillong, Naiwieng 09
Kum shibynta ban rakhe lehkmen halor ka jingdap ba 125 snem pura, ka Seng Khasi ha ka 09 tarik u Naiwieng 2025, ka la pynïeng ïa ki Mawbynna sahnam ha Lum Sohpetneng.
Ki Mawbynna kiba la pynïeng da ka Seng Khasi ha Lum Sohpet-neng ki don haduh 41 tylli kiba la synñiang sngewbha da ki jylli, tnat Seng Khasi bad Seiñ Raij.
Ka jingpynïeng ïa ki Mawbynna ka la sdang naduh dangstep, ha kaba baroh 41 tylli ki la pynïeng ïa la ki jong ki jong ki Mawbynna sahnam, ha ryngkat ka jingkynhoi, ka tem ka put na ki longkmie bad ki samla.
Hashwa ban pynïeng ïa ki Mawbynna, ka la don ka jingduwai phirat na ki rangbah jong ka seng, ban ainguh aidem ïa u trai kynrad, ba hato kane ka long kaba biang ne-em halor ka jingthmu jong ka seng, bad hadien ba la dep ban ainguh aidem ki la sdang sa ban pynïeng ïa ki Mawbynna.
Ha kane ka sngi, la don da ki hajar ngut ki paidbah kiba la wan na kylleng ki jaka jong ka Khasi-Jaintia ban sakhi ïa ka jingpynïeng ïa ki Mawbynna sahnam ha Lum Sohpetneng.
Haba ïa kren bad u Bah Dipshon L Nongbri Vice President Seng Khasi u la ong ba kane ka dei ka snem kaba kyrpang namar ba ka seng ka la kynjoh sha ka rta ba 125 snem.
“Ngi la pynlong ïa shibun ki tamasa ban lehkmen ka jingdap 125 snem ban pynsngewthuh ïa la ka riti ka tynrai bad kane ka jingpynïeng ïa ki Mawbynna ka dei kawei kaba kongsan tam ha ka jingrakhe,” u la ong.
U la ong ba kine ki Mawbynna kiba long ki mawnam ban ïeng kynjreng hangne ha Lum Sohpetneng. “Kam long pat ban ïeng da ka kyrteng jong u briew ba shimet ha kane ka bynta ba ha kliar duh. Hooid ngi don ka bynta kaba khraw bha ban pynneh pynsah bad ngi kyrmen ka lawei ka pateng hadien habud kan ïoh i kan kmen ïa ka jingïeng ki Mawbynna ha u Lum Sohpetneng,” la ong u Bah Dipshon.
Haba kylli u Bah Dipshon u ong “Kine ki maw kiba la wanrah dei kiba la ai da ka mei ram-ew, ka jingheh jingrit ruh ka dei la ka jong bad kane hi kadei kaba la ai da ka mei ram-ew, ym dei ban ngin da thew bad khet hi mangi. Ia kine ki maw la pynwanpoi na ki dong ki shnat bad ki thaiñ bapher-bapher”.
