Shillong, Naiwieng 09
Ki nonghikai ha North-Eastern Hill University (NEHU) hapoh ka shatri jong ka NEHUTA ki la pyrshah jur ïa ka rai ban pynlong ïa ka jingïalang kaba 193 jong ka Executive Council (EC) ka NEHU ha New Delhi ha ka 14 tarik Naiwieng, da kaba ong ba ka dei ka “jingpynsyrwa kai bad ka sienjam kaba ïaid shadien” kaba pynkheiñ ïa ki jingbthah ka tnad Sorkar Pdeng bad ki jingïateh kular kiba hashuwa.
Ha ka shithi ba la thoh sha u Pro-Vice-Chancellor ka skulbah, u Prof. S. Umdor, ka NEHUTA ka la ong ba ka “pyrshah jur ïa kane ka sienjam” ban khot jingïa-lang shabar jong ka skulbah kaba ha Shillong.
Ka seng ka la kynnoh ba u Vice-Chancellor, u Prof. P.S. Shukla, uba la “pep na ka kam na Head-quarter ka NEHU la jan shisnem,” u pyrshang ban pynïaid ïa ka jingïalang “da kaba pynkheiñ ïa ka jingïasngewthuh jingmut kaba la pynbeit ha kaba sdang jong une u snem bad ka tnad pule-puthi ka Sorkar Pdeng lem bad ki nongshim bynta jong ka skulbah.”
U Prof. Shukla u la mih noh na ka shlem pule jong ka NEHU naduh u bnai Naiwieng jong u snem ba la dep hadien ba la mih ki jingïakhih kiba la saphriang halor ki jingkynnoh ba don ka jingpynïaid bakla ïa ki kam ki jam, ka jingleh shiliang, bad ka jingshim rai ba khlem jingïasyllok.
Katkum ka jingïathuh ka NEHUTA, ïa ka jingïalang jong ka EC ha Delhi, la pynbeit ban long hangtei, namarba ki jingïakhih ki dang jur, pyrshah ïa ka jingthmu jong u, ban wan jngoh ïa ka shlem pule ka skulbah ha Shillong, ha kaba ki samla pule, ki nonghikai, bad ki nongtrei, ki la pynbna ïa u kum u briew u bym lah ban pdiang ne ‘Persona Non Grata’.
Ka NEHUTA ka la pynkynmaw ba ha ka jingwan jngoh jong ka kynhun ka tnad pule-puthi ka Sorkar Pdeng sha Shillong ha ka 22 tarik u Jymmang, 2025, la mynjur ba ka jingïalang jong ka EC ha ka 30 tarik u Jymmang ha Delhi kan dei kaba khatduh eh ka ban pynïaid da u Prof. Shukla – hadien kata ki Pro-Vice-Chancellor kin pyndep ïa ki kam jong u VC katkum ki kyndon aiñ jong ka skulbah.
Ka seng ka la kynnoh ruh ba u Prof. Shukla u la tuklar ïa ki kam ki jam jong ka skulbah watla hapdeng ba la poi sha ka jingïasngewthuh-jingmut kham hashuwa.
Kane ka kynhun ki nonghikai ka la buh jingkylli ruh halor ka “jingpynlut ka bym donkam” ha ka leit ka wan bad ki jingsiew na ka bynta ban pynlong ïa ka jingïalang ha Delhi, da kaba ong ba ka “pyntlot ïa ki sienjam ban pynduna ïa ka jingpynlut pisa ba la shim da ka skulbah.”
Shuh shuh ka seng ka la kdew ïa ka jingbthah ka tnad pule-puthi ka Sorkar Pdeng (F. No. 20-13/2024-CU.IV, dated August 20, 2024) kaba bthah ïa baroh ki skulbah ka Sorkar Pdeng ban pynlong ïa ki jingïalang katkum ki kyndon aiñ hapoh k shlem pule jong ka skulbah khnang ban pyntikna ïa ka “jingshai, ka jingïoh lad bad ka jingtreikam kaba paka.”
“Ka NEHUTA ka pynrem ïa ka jingwan tuklar ka bym ïahap jong u Prof. Shukla (u briew u bym shym la pdiang) ne ‘Persona Non Grata’ bad kyntu ïa ka bor ba dei khmih ban ym pynsyrwa kai ïa ki jingdon-jingem kiba khyndiat jong ka skulbah ha ki jingïalang shabar jong ka nongbah Shillong,” la ong ka seng da kaba bynrap ba kan ïai bteng ban ïada ïa ka bha ka miat jong ki nonghikai bad ka imlang-sahlang jong ka skulbah.
