Shillong, Naiwieng 10
U Superintendent of Police (SP) ka East Khasi Hills District, u Bah Vivek Syiem u la pyntip ba ki pulit ki la kem ïa 4 ngut ki nongïalam jong ka Meghalaya Commercial Truck Owners and Drivers Association (MCTODA) bad la pynngat ruh ha ki 4 tylli ki mukotduma.
Haba kren sha ki lad pathai khubor ha ka sngi Nyngkong jong ka taïew, u Bah Vivek u la ong ba ka jingkem ïa kitei ki nongïalam ka dei namar ba ki donkti ban shoh bad rahbor ïa ki nongñiah trok kiba kit mar na West Jaiñtia bad kiba ïaid lyngba na East Jaiñtia Hills District.
Kum ban shu kdew, ha ka step jong ka 05 Tarik u Naiwieng 2025, ki dkhot ka MCTODA ki la pynlong ka jingïakhih bad ka la mih ruh ka jingkulmar kaba jur bha, ha kaba ki pulit ki la hap ban pyndonkam da ki bom pynsat khmat ban tem ïa ka jingkulmar. U Bah Vivek u la ïathuh ba ka la don ka jingshah ther maw kaba jur ïa ki trok ba kit dewbilat bad ‘Clinker’ ha Mawryngkneng, katba ki trok ki dang wan phai na ki thaiñ Jaiñtia Hills.
“Ki nongïalam ba la shah kem ki dei kiba long hakhmat eh ha katei ka jingïakhih bad kiba leh ïa kine ki kam bymman ha katei ka jaka,” la ong u Bah Vivek.
Shuh-shuh u Bah Vivek u la ïathuh ba ki Magistrate ki la maham jur ïa ki dkhot ka MCTODA ba kim dei ban pynthut ïa ka lynti ïaid jong ki trok, hynrei ki la jied pynban ïa ka lynti ka bym dei, da kaba lun maw kaba la pynlong ïa ki pulit ban bom da ki lathi.
Haba kylli, u Bah Vivek u la kyntait ïa ka jingkynnoh ba ki pulit ki la leh palat pud, da kaba ong ba ki pulit ki leh ïa kane ban tehlakam ïa ka shongsuk shongshngaiñ.
“Ki Magistrate ki la hukum ïa baroh ki briew kiba don ha katei ka jaka ba kim dei ban pynthut ïa ka ïaid ka ïeng jong ki trok, hynrei haba ki trok ki wan, ka la mih ka jingshah lun maw kaba shyrkhei bad ka jingshah shoh ïa ki nongñiah trok. La don ruh u wei u briew uba la shah rahbor bad kaei kaba jia ka long ba ka la don ruh ka jingkulmar kaba shyrkhei ha kaba ki pulit ki la hap ban pyndonkam da ki lathi. Kane kam dei kaba ngi pynkheiñ ïa ki kyndon aiñ bad kam shym la don ruh ka jingleh palat pud na ka liang ki pulit,” la bynrap shuh shuh u Bah Vivek.
U Bah Vivek u la ong ruh ba kam shym don kano-kano ka jingpynbor ban pyllait noh ïa ki nongïalam ka MCTODA kiba la shah kem. “Ka rai ban ai jamin ka shongeh ha ka Ïingkashari,” u la ong.
