Jowai, Naiwieng 10
Ka Joint Action Committee, kaba kynthup ïa ka East Jaiñtia Hills Truck Owners & Drivers Association bad ka Jaiñtia Hills Truck Owners Association kala leit ban dawa na u Symbud Myntri Rangbah ka Jylla u Bah Sniawbhalang Dhar uba dei khmih ïa ka tnat Transport ban khot noh katba lah kloi ïa ka jingïalang jong baroh kiba don bynta ha kaba ïadei bad ka kit ka bah ki trok na ki karkhana dewbilat na rilum Jaiñtia.
Ïa kane, ka JAC kala pynpaw ha ka dorkhas kaba la ai sha u Symbud Myntri Rangbah ha ka 10 tarik Naiwieng, lyngba u Chairman bad u Assistant Secretary jong ka, u Ma Biangshwa Shylla bad u Ma Deolangki Dkhar bad kiwei ki nongkitkam.
“Khnang ban ïoh ban ïapyrkhat, ïapynbeit bad pynkut noh ïa kane ka jingshah bat jong ki trok kit dewbilat bad clinker na ki karkhana dewbilat ha East Jaiñtia Hills, na ka jingïakhih ka MCTODA, ngi dawa na phi ban khot noh da ka jingïalang jong kiba ïadonbynta lang (stakeholders),” ong ka kyrwoh ka JAC.
Ka JAC kala ai ruh ïa ka dorkhas sha u Symbud Myntri Rangbah, Bah Prestone Tynsong, ba dei peit ïa ka tnat Kam Pohïing, bad sha u Myntri Rangbah ka Meghalaya, u Conrad K Sangma.
“Ngi la pynsngew lut ïa ki jingeh jong ngi hakhmat u Bah Sniawbhalang Dhar, kaba ngi la ïakynduh mynta la ar taïew pura na ka daw jong ka jingbym ïoh shuh jong ki trok jong ngi ban leit kamai kajih. Ngi la pynsngew ruh ha u, ïa ka jingud jinglynñiar lang jong ki trai trok, ki nongshalan mar bad ki nongñiah kali lem bad ka longïing longsem jong ki, halor ki jingsohsat kiba mih na ki jingdawa ba donkam eh bad ba bun jait ha ïing ha sem – kum ka bam ka dih, sa ka pang ka shitom, ka bai dawai dashin bad kiwei-kiwei de”, la ong u Ma Biangshwa Shylla, Chairman ka JAC.
U Ma Deolangki Dkhar, Assistant Secretary ka JAC, u la ong, “Ngi la pynsngew kyrpang ruh ha u Symbud Myntri Rangbah, halor ka jingïakynduh mawsiang jong ki trai trok bad ki nongshalan mar halor ka EMI jong ki trok sha ki bank; ka bai skul, ka bai hostel, kaba la pyndik ïa ka pule-puthi bad wat ïa ka lawei jong ki khun ki kti jong ngi; ka jingwan ka Khristmas bad u Snem Thymmai; lem bad kiwei-kiwei de ki jingeh, nalor ka jingshah ktah jong ka jinglum khajna jong ka Sorkar Jylla, tang na ka daw jong ka jingïakhih kaba la neh mynta da ki taïew”.
“Ha kajuh ka por ruh, ngi la pynkynmaw biang ïa u Symbud Myntri Rangbah, halor ka jingkular jong ka Sorkar ïa ka JAC ban lum kloi noh ïa ka jingïalang jong baroh ki nongïalam na ki kynhun bapher-bapher lem bad ka Sorkar hadien ba la dep ka shuti Puja bad Assembly Session, khnang ba yn ïoh ïashong pyrkhat bad ïashim rai na ka bynta ki mat jingdawa jong ka JAC ban pynkiew ïa ka bai kit bai kit dewbilat bad clinker na ki karkhana ha East Jaiñtia Hills bad ruh kiwei-kiwei kiba dei na ka bynta ka bha ka miat jong baroh ki trai ri trai muluk ba don trok, ki nongshalan mar bad ki nongñiah”, la bynrap biang u Ma Biangshwa Shylla.
Ka JAC kala dawa ruh na ka Sorkar ba kam dei ban klet ban khot ïa ka (JAC) sha katei ka jingïalang jong baroh kiba dei ban ïashim bynta (All Stakeholders), namar, nalor ba ka Sorkar ka la kular lypa ban leh ïa kata ha kine ki bnai ba la dep. Ka JAC kala pynpaw ba ka dei kawei na kiba dei hok ban ïoh ïashim bynta ha kiba kum kita ki jingïalang pyrkhat kam na ka bynta ban ïapynbeit lang noh ïa kane ka kynrum kynram ha ka rukom kaba ïahun lang, da kaba maham ruh, ba, lada jia ba leh lyndet lane klet ban khot ïa ka JAC sha ka jingïalang, kan shim ki sienjam kiba tyngeh, maham ka JAC.
