Shillong, Nailur 06
U nongïalam jong ka United Democratic Party (UDP) uba long ruh u MLA jong ka West Shillong u Bah Paul Lyngdoh, ha ka Sngi Saitjaiñ u la ong ba ka Sorkar Jylla ka dei ban plie ka lad ban ïakren bad ka Khasi Students’ Union (KSU), khnang ban ym mih kino-kino ki jingïakhih kiba lah ban wanrah ka jingduhnong ha ka jingïoh lum khajna jong ka Jylla.
Haba ïadei ka jingbyrngem ka KSU ban pynjur ki jingïakhih, lada ka Sorkar kam sngap ïa ki san tylli ki mat jingdawa. U Bah Paul u la ong, “Ka long kaba kongsan bha ïa ki nongïalam ban don ïa kaei kaba ngi khot ka jingbishar bniah ïa ka jingïoh jingmyntoi. Ha kano-kano ka jinglong jingman, phi hap ban bishar bniah ïa kaei kaba phi khmih lynti na ki kam jong phi, kaei ban long ka jinglut bad kaei ka ban long ka jingmyntoi.”
Shuh-shuh u Bah Paul u la ong ba u shaniah ha ka jingïakren bad jingkular, “To ai ba ka jingïakren kan long hapdeng ka Sorkar Jylla bad ka KSU, namar haba la plie ïa kine ki lad jingïakren bad lada don uwei u nongïalam ba rangbah na ka Sorkar uba don jingïadei jan bad ki nongïalam KSU, bun ki mat lah ban pynbeit khlem da wanrah ïa ka jingsngewkhraw, khlem da pyni mano ba kham shlur ne kham donbor bad kine baroh kim donkam” u la ong.
U Bah Paul u la ong ruh, “Ha kum kane ka por, ngan pynksan tang ïa kane ba dei ban don ka jingïakren kaba ïai bteng hapdeng ka Sorkar Jylla bad ka KSU, khnang ba kan ym don kino-kino ki sienjam kiba lah ban wanrah ka jingduhnong ha ka jingïoh lum khajna jong ka Jylla lane ka jingjah burom ka Jylla. Nga ngeit ba kine ki long ki thong kiba kongsan tam kiba dei ban urlong.”
Lah ban kdew ba ki saw ngut ki nongïalam ba hakhmat jong ka KSU ba kynthup u samla Raymond Kharjana President, u samla Pynkmenlang Sanmiet Vice President, u samla Reuben Najiar General Secretary bad u samla Jeremaiah Pohthmi Assistant Organising Secretary ki la shah kem namar ka jingkynnoh ba la mih ka huri hura ha ka 19 tarik u Nailar ha ka bike rally rah lama ïong ka KSU.
