Shillong, Nailur 06
U Bah VGK Kynta uba dei u kyrtong jong ka United Democratic Party (UDP) ha ka ilekshon MP Lok Sabha shiteng samoi u la pynpaw ba um kwah ban ong eiei halor ka jingmih khubor ki MLA ka UDP ha kine ki sngi.
Haba ïakren bad u Bah Kynta u la ong, ka kam jong u kum u kyrtong ka long ban pynbeit ïalade ban ïalap ïa ka ilekshon ba ïoh ïa ka jingjop kum u kyrtong MP ha kane ka ilekshon shiteng samoi na ka seng riewlum.
“Ngam dei u nongkitkam jong ka UDP, ngam lah ban ong eiei halor ki MLA ka UDP namar kane ka dei ka kam jong ka UDP,” u la ong.
U la ïathuh ba ha kine ki sngi haba leit pynlong jingïalang ïalap ilekshon ha Khliehriat, ki MLA ka UDP ki dang wan synranlang ïa u bad ha kine ki sngi ruh ki dang ïadonlang haba pynlong ïa ka jingïalang ha ophis treikam ka UDP.
“Haba nga leit ïalap ilekshon bad ki nongkitkam ka UDP nga sngew don jingkyrmen ban rah ïa ka jingjop bad ngin dang trei shitom shuh shuh ban pan jingkyrshan na ki paidbah haduh ban da dei ka sngi thep vote,” u la ong.
Kumban shu pynkynmaw ka khubor ha kine ki sngi ka la mih ba ki khyndai ngut ki MLA ka UDP kin rung noh sha ka BJP kaba bat ïa ka bor synshar ha Delhi bad 2 ngut kin rung sha ka NPP.
Ka jingïakren u nonglum khubor ïa u Bah Kynta ka long kaei ka jingsngew haba u pynkhreh ïa ka ilekshon MP Lok Sabha hynrei haba ki mih kum kine ki khubor ba ki 11 ngut ki MLA ka UDP kin mih, hynrei um kwah ban ong eiei namar kane baroh ka dei ka kam jong ka UDP.
Lada ka urlong shisha kane ka khubor ba ki 11 ngut ki MLA ka UDP kin mih noh, kan long ka jingeh kaba khraw ïa u Bah VGK Kynta ban ïakhun ïa kane ka ilekshon MP Lok Sabha.
