Nongstoiñ, Nailur 06
U Bah Sniawbhalang Dhar, Symbud Myntri Rangbah ka Jylla u la ong ba dei ka Sorkar NPP kaba peit ïa ka jingeh ki paidbah ka thaiñ Maweit, khamtam ha kaba ïadei bad surok.
U Bah Sniawbhalang u la ïathuh ba ha kane ka dorbar synrai kaba dang shu dep la ïakren ïa ka surok ha Maweit ba tang ba kan kut noh ha Maweit, ka surok kam pat biang, da kaba bynrap “Ngan klet noh ïa ka HSPDP, ïa ka NPP bad ïa ka UDP hynrei yn ai surok sa na Maweit sha Kulang Nongjri kan kiew ka ïoh ka kot jong ki paidbah”.
U Bah Sniawbhalang u la kren ïa kane sha ki paidbah ka thaiñ Maweit ha ka jingïalang paidbah jong ka NPP na ka bynta ka ilekshon MP shiteng samoi ïa kaba la pynlong ha ka sngi Saitjaiñ jong ka taiew ha madan Maweit, West Khasi Hills.
Shuh shuh u la ong ruh ba don bun kiba kren, don kiba ong ba kane ka NPP ka dei ka Sorkar lehbor, ka dei ka Sorkar tuh.
“Ngan ong ïa phi katba phi dang kren ngin nym patiaw, ngi la rben ka snieh doh, ngi donkam ban trei, katba phi dang kren beiñ ngin trei bha ïa u paidbah kata ka dei ka Sorkar kaba ïalam da ka NPP,” ong u Bah Sniawbhalang bad bynrap ruh “Ngam ong ba kiwei kiwei ki MLA kim trei, em kiba trei suda baroh hynrei ka NPP ka kham pher na kiwei, kam ju ñiew shilliang, bunsien ngi sngap ïa ka jingud jingnam jong ki paidbah, kata ka dei ka seng kaba ïalam ïa ka Jylla la phra snem tam mynta”.
“Nga ong ïa phi ka kamram jong phi ki paidbah ka dei ban pynjop ïa u nongmihkhmat bad ka kamram ban ïatrei bad no ban thaw Sorkar bad no ka kamram jong u nongmihkhmat, ym jong u paidbah bad ym dei ba ngi ïatreilang bad ka BJP ba ngin kylla niam bad ka BJP, ngi trei na ka bynta ka roi ka par na ka bynta ban pyndap pynbiang ïa ki khun ki raiot jong ngi kiba dang sah dum kata ka dei ka jingpyrkhat jong ki nongïalam ki jong ngi,” ong u Bah Sniawbhalang.
Shuh shuh u la ong ruh don kiwei ki seng ba ki kren ba ieit jaitbynriew bad kata ka jingieit jaitbynriew ka don bun jait, “Lada u kpa u ong nga ieit ïa ka tymmen ka jong nga khlem u khaw kam dei ka jingieit, kumjuh ruh u MLA u ong ba nga ieit ïa ki paidbah khlem trei kam, ka dei tang ka jingieit shyntur. Kumta kum ki paidbah ïa kum kine, dei ban sngewthuh ym dei ban shah pynbiej.”
U Bah Sniawbhalang u la ai khublei ïa baroh kiba wan ha ka jingïalang la ka long na ka HSPDP, UPD, Congress ha kaba u la ong, “Ha kane ka kynti ka long kaba sngewtynnad lada phi leit sha Jaiñtia kin ong ba ngim thep ïa ka NPP hynrei ngin thep ïa u Dr. DRL Nonglait, kumjuh ruh sha ki thaiñ Mawthadraishan lei ki thaw da ki kynhun bad ong beit ka kynhun ki nongkyrshan u Dr Nonglait,” kumta u la kyntu ruh ïa ki paidbah ka thaiñ Maweit ba kin kyrshan ïa ka NPP ha ka kyrteng u Dr. Nonglait.
Ha kane ka sngi, la donlang ruh u Dr. DRL Nonglait uba long u kyrtong, Bah Andreas Ryntong General Secretary NPP Maweit Area, Bah Gigur Marthong uba long u President NPP West Khasi Hills bad ruh u MLA bad MDC barim, ki longkmie bad kiwei kiwei.
