Nongstoiñ, Nailur 06
Ka jingjia nia kaba jur kala mih hapdeng ki paidbah bad ki bor pulit bad ophis ka Assam hapoh ka shnong Noapara, kawei na ki shnong ha ka thaiñ Langpih namar ka jingwan lum khana samari khlem ai jingpyntip ha katei ka shnong.
Haba wad jingtip halor kane ka jingjia, u Superintendent of Police (SP) ka West Khasi Hills Bah HP Kharkongor u la ong, kala mih ka jingïania bad ïakynad hapoh ka shnong Noapara, ka shnong khappud ha ka thaiñ Langpih hadien ba kala don ka jingwan jong ki bor pulit bad ophisar Sorkar na Assam khlem ka jingpyntip na ka bynta ban lum khana samari ha katei ka shnong.
U SP u la ong ruh ba ki pulit ka Langpih Border Outpost (BOP) kila ïoh ïa ka jingpyntip lyngba ka telephone na u Sordar ka shnong Noapara ha ka 3 tarik u Nailur ba ki bor ka Sorkar Assam ha ryngkat ka jingsynran da ki pulit kila wan rung sha katei ka shnong klem da ïoh jingbit ne pyntip sha ki bor shnong bad bor pynïaid District ka WKHD.
Shuh shuh la ong ruh ba hadien katei ka jingïoh jingtip, ki pulit ka Langpih kila leit sha katei ka jaka na ka bynta ban peit bad khmih ïa ka jinglong jingman ha kaba kila lap ba kila don ar ngut ki riew shimet kiba la wan hapoh ka shnong Noapara ryngkat ka jingsynran ki pulit jong ka Assam bad la ong ba ka jingthmu jong ki ka long ban wan lum khana samari ne census hapoh katei ka shnong.
U la ong ruh ba kham hadien ba kala don ka jingïakren bad ïa pynbeit bad la phah leit phai noh ïa kitei ki briew jong ka Assam namar ba ka jingwan ka jong ki khlem ka jingpyntip ka lah ban wanrah ïa ka jingïaklumar kaba jur bad kaba lah ruh ban poi shaduh u pud jong ka jingïakajia ha kaba kitei ki briew na Assam ruh kila leit phai noh bad suki suki ka jingïalum briew kala sdang ban pra noh.
Shuh shuh ka khubor na u SP ka ong ruh ba katei ka jingïakajia kala mih ruh namar ba kala don ar kynhun hapoh jong ka shnong ha kaba shi kynhun la ong ba ki kwah ban don bad ka Assam bad katba kawei pat ka kynhun kaba kwah kum ki nong Meghalaya bad da ka jingïalum paidbah, kitei ki ar kynhun kala wanrah ïa ka jingïania bad jingïakajia ha katei ka por.
U Bah HP Kharkongor u la ong ruh ba na ka liang jong ki bor pynïaid district kila peitngor bha ïa katei ka jaka ban ïada na ka jingmih jong kano kano ka jingïakajia bad ban pynneh ïa ka shongsuk shongsain.
