Jowai, Nailur 06
Ka District School Education officer (DSEO), West Jaiñtia Hills ha ka 5 tarik Nailur kala rakhe ïa ka sngi kyrpang jong ki nonghikai ne ka 65th Teachers’ Day kum ka jingñiewkor ïa u synñiang u bynhei ba ki nonghikai kila noh na ka bynta ban kyntiew ïa ka pule puthi.
Ïa kane ka jingrakhe la pynlong ha District Library Auditorium, Jowai, ha ka jingdonlang u Bah Lahkmen Rymbui, Myntri ba dei peit ïa ka tnad pule puthi ka Sorkar Jylla kum u kongsan, u Bah Kyntu Shullai, MCS Assistant Commissioner & BDO ka Laskein C&RD Block, West Jaiñtia Hills District kum u symbud kongsan, ka Dr. Wa I Sa Sumer, District School Education Officer nalor ki nonghikai bad ki khynnah skul.
Haba ai jingkren ha ki jingïalang, u Bah Lahkmen Rymbui u la ai khublei ïa ka jingaiti bad jingshimkhia jong ki nonghikai ban ïarap ïa ki khynnah pule. U la kdew ïa ka bynta jong ki nonghikai kala nangkiew ryngkat bad ka jingkylla ha ka pule puthi bad ban jur ïa ka jingdonkam ban ïai bteng ka jingpynkylla dur ban pyndap ïa ki jingdonkam jong ki khynnah skul.
U Myntri u la pynshlur ïa ki nonghikai ba kin long ka lad ai mynsiem bad ka jingkyrmen ïa ki khynnah skul, khamtam eh ha kaba ïarap ïa ki ban jop ïa ka jingshah pynbor ne ïalam bakla ha ki paralok.
U la ban jur ruh ba ka jingpule ka dei ban ïaid shabar jong ki marks, ki syrnod bad ki kot pule da kaba pynleit jingmut kham bun ha kaba pynroi ïa ka jingtbit bad ka jinglah jong uwei pa uwei u khynnah skul.
Haba ïadei bad ka jingdonkam jong ka Teacher Eligibility Test (TET) na ka bynta ki nonghikai kiba dang don ha ka kam, u Myntri u la pdiang ïa ka jingeh jong ki nonghikai khamtam kito kiba la slem bha ka jingshakri, bad pyntip ba la pynjlan ïa ka por ban pyndep ïa ki kyndon naduh u snem 2027 haduh u snem 2028. U la ai khublei ruh ïa ki nonghikai kiba la jop ha ka MTET.
U la pynskhem biang ïa ka jingangnud jong ka Sorkar ban weng ïa ki jingeh jong ki nonghikai bad khot ïa ka jingïatreilang ban pynkhreh ïa ki samla pule da ka jingnang jingstad, ka jingtbit bad ka jingshaniah kaba donkam ban ïakhun ïa ki jingeh jong ka lawei.
U la ai khublei ruh ïa ki nongïoh khusnam jong ka Jylla bad District halor ka jingshakri kaba long ka nuksa bad ka jingnoh synñiang jong ki ha ka pule puthi.
U Bah Kyntu Shullai u la pynpaw ka jingsngewnguh ïa ki nonghikai na ka bynta ka jingaiti bad jingkitkhlieh jong ki ban pynwandur ïa ki pateng ban wan. U la pynpaw ba ki nonghikai ki don ka bynta kaba kongsan ym tang ha kaba ai jinghikai hynrei ha kaba pynskhem ïa ki jinglong, ban pynroi ïa ka jingsngewrit, ka jinglong ba janai bad ban tei ïa ka jinglong hapdeng ki khynnah skul.
U la pynshlur ïa ki khynnah skul ban burom ïa ki nonghikai jong ki da kaba pyntreikam ïa ka jingnang jingstad bad ki jinglong ba la ai ha ki bad ban long ki nongshong shnong kiba don ka jingkitkhlieh bad ki nongïalam jong ka lawei.
Ha kane ka jingrakhe la sam ïa ka khusnam District Awards bad Best Scout Master and Guide Captain kum ka jingithuh ïa ka jingshakri bad ka jingnoh synniang jong ki ha ka liang ka pule puthi.
Ïa ka khusnam District Teachers’ Award la ïoh pdiang da u Bah Kissme Sungoh Assistant Teacher Nartiang Presbyterian Upper Primary School bad Kong Phrangki Pran Assistant Teachers Thangrain Lower Primary School katba ïa ka khusnam Scout Master and Guide Captain la ïoh pdiang da ka Kong Lamisakani Dkhar na Lissi Pearls Secondary School, Mukhla.
Ban pynphuh pynphieng shuh shuh ïa kane ka jingrakhe, ki khynnah na ki skul bapher bapher kila shim bynta ha ki jingrwai bad jingshad bad la pynwai ïa ka jingïalang da ki kyntien khublei na ka Kong W. Nonghuloo, SDSEO, Amlarem.
