Shillong, Naiwieng 10
Ka Khasi Students’ Union (KSU), Bengaluru Unit ka la dawa na ka Sorkar Jylla na bynta ka jingpynbiang liengsuiñ kaba na Shillong sha Bengaluru bad ban pynsted haba ïadei bad ka jingpyntrei ïa ka Meghalaya House, Bengaluru.
Ka seng ka la ïoh ban aiti ïa ka dorkhast haba ïadei bad kitei mat jingdawa (nalor kiwei) halor ki jingeh bad jingdonkam ki Khasi bad Garo kiba don ha Karnataka lyngba u James Sangma, uba long u hynmen u Myntri Rangbah ka Jylla ha ka ‘North East Fusion Carnival’ (NEFC) kaba la long ha Bengaluru ha ka Sngi U Blei.
Katkum ka kyrwoh khubor na ki nongïalam ka KSU Bengaluru Unit, ki mat jingdawa ba kham kongsan ha katei ka dorkhast ki kynthup ïa ka jingpynïasoh liengsuiñ (ba beit bad khlem sangeh) hapdeng ka Shillong bad ka Bengaluru.
Ha kajuh ka por, ka seng ka la dawa ban pyndep bad pyntreikam noh kham kloi ïa ka Meghalaya House.
“Kane ka jingdawa ka la sahteng ha kaba ka KSU Bengaluru Unit ka la buh hakhmat ka Sorkar Meghalaya la bun-bun snem. Ka KSU ka dawa ïa kane ka mat namarba bun ngut ki Khasi ki pule bad trei shathie bad don ki khep ba kim ïoh ki jaka sah kiba suk kum ha Kolkata ne Delhi,” ong ki nongïalam.
Shuh shuh ka seng ka la kyntu ïa ka Sorkar Jylla ban ïarap lem ïa ki Khasi ba ïap ha Bengaluru ha ka ban pynpoi ïa ka met jong ki sha Ri-Khasi.
“Bun na ki Khasi kiba trei bad pule sha Karnataka ki wan na ki longïing ba duk bad lada jia eiei kaba sngewsih, ka shitom bha ban kyrshan ïa ki wat lada ka KSU ka ïaleh katba lah ban ïarap ïa ki,” ki la ong.
Ha katei ka jingïakynduh – ‘North East Fusion Carnival’, ki Khasi kiba pule bad trei ha Karnataka ki la shim bynta shitrhem ha kane ka lympung kaba kdup ïa baroh ki jaidbynriew trai-muluk ka Thaiñ Shatei Lam Mihngi.
