Amlarem, Naiwieng 10
U Myntri Rangbah ka Jylla, u Conrad K Sangma, ha ka 10 tarik Naiwieng u la pynlong ïa ka Block-Level CM Connect Programme ha Amlarem Civil Sub-Division, West Jaiñtia Hills District, kum shi bynta jong ka jingthmu jong ka Sorkar ban kyntiew ïa ka jingïadei beit hapdeng ka Sorkar bad ki paidbah.
Kane ka prokram ka la ïahap ruh bad ka jingplie ïa ka jingrakhe Jubili Ksiar jong ka Amlarem Sub-Division kaba la neh shisnem bad la sakhi ruh ïa ka jingïashim bynta naduh ki ophisar Sorkar, ki nongïalam shnong bad ki paidbah nongshong shnong na ki shnong bapher-bapher.
Ka jingthmu jong ka CM Connect ka long kum ka lad na ka bynta ki nongshong shnong ban pynpaw ïa ki jingeh, ban wad jingtip bad ban ïakren beit bad ki heh Sorkar na ka bynta ki lad ki lynti kiba la buh por.
Ha kane ka jingïakren paidbah, u Myntri Rangbah ka Jylla ha ryngkat u Bah Lahkmen Rymbui, Myntri ka tnat Pule Puthi, u Bah Sosthenes Sohtun, Myntri ka tnat C&RD, u Sibhi C Sadhu, IAS, Director ka C&RD, u Abhinav Kumar Singh, IAS, Deputy Commissioner bad ka Anendya Raajsshre, IAS, SDO (Civil), Amlarem, kila ïakren bad ki paidbah halor ki mat kiba bun jait.
Ka jingïalang ka la ïakren ïa ki bynta ba kongsan kum ka jingpynbiang um, ka pule puthi, ki jingshakri ha ka koit ka khiah, ka jingpynïasoh ïa ki surok, ka bording bad ka jingpynkupbor ïa ki kynthei.
Ki nongshong shnong kila wanrah ïa ki mat bad jingsngewkhia ha kaba ïadei bad ka jingsam um hapoh ka JJM, ka jingduna ki nonghikai, ki jingtei skul ki bym biang bad ki jaka sumar bym biang ha ki shnong ba jngai.
U Myntri Rangbah ka Jylla u la bthah ban buddien mardor ïa ki tnat, kynthup ïa ka jingthung ïa u Medical Officer ha Padu Dispensary, ka jingbishar bniah ïa ki skhim JJM, ban pynbiang bording na ka bynta baroh ki Anganwadi Centre.
Haba ai jingkren ha ka jingïalang, u Conrad K Sangma u la ong, ka CM Connect ka pyni ïa ka jingangnud jong ka Sorkar ban ïoh ïa ka jingsynshar kaba shai da kaba sngap nyngkong ïa ki jingeh jong ki paidbah bad shim ïa ki lad ki lynti kiba stet ha ka liang ka jingsynshar.
U la pynbna ruh ïa ka T.10 lak na ka CM-SDF na ka bynta ban tei ïa ka ïing jong ka Cluster Level Federation na ka bynta ka Self-Help Groups ha Amlarem, da kaba pynksan ïa ka jingdonkam ban kyrshan ïa ki kam ban seng kam seng jam.
U Myntri Rangbah u la pynpaw ba yn sa buh ïa ki CM Connect Centre ha baroh 56 tylli ki block jong ka Jylla Meghalaya kum ki physical one-stop hub na ka bynta ban pynbeit ïa ki jingeh bad ban ïoh ïa ki skhim Sorkar, katba ki nongshong shnong ki lah ruh ban ïakynduh ïa ka Sorkar lyngba ki number khlem jingsiew 1971/18600-84531330. 94363, bad phah email sha [email protected].
Ka CM Connect Programme ha Amlarem ka long kawei pat ka sienjam ha kaba pynkhlaiñ ïa ka synshar khadar, ka jingkitkhlieh, bad ka jingïashim bynta lang jong ki nongshong shnong ha kylleng ka Jylla Meghalaya.
