New Delhi, Naiwieng 10
Haduh phra ngut ki briew ki la duhei ïa la ka jingim bad kumba 24 ngut kiwei pat ki mynsaw hadien ba ka jingdon jong ka jingbthei ba khlaiñ bor bha ha kawei ka kali kaba don ryngkat ki briew kaba la jia ha ka janmiet jong ka sngi Nyngkong ha Red Fort, Delhi, kaba dei ruh kawei na ki jaka jngohkai pyrthei kaba paw bha.
Katkum ka khubor, la ong ba kane ka jingbthei ka la jia ha ka por kumba 7 baje eiei janmiet hajan jong ka Red Fort Metro Station, ha kaba ki met briew ki la pra bad saphriang kylleng bad ruh ki kali. Ka jingbthei ka la long kaba khlaiñ bor bha haduh katta-katta.
Watla ym pat lah ban pynthikna pura halor ka jingbthei hynrei la suba jur ba lah ban dei u bom.
Katkum ka jingpyntip na u Police Commissioner ka Delhi u Satish Golcha, la ong ba ka jingbthei ka la jia ha kawei na ki kali kaba la ïaid suki bha bad sangeh haba la pynmeh ïa ka light saw ka dak ba ju pynsangeh ïa ki kali ha surok bad bynrap ruh ba hapoh kane ka kali kaba bthei ki la don ruh ki nongshong kali.
La ong ruh ba ha kane ka jingbthei u bom ha katei ka kali, kiwei ruh ki kali kiba don marjan ki la shah ktah lang bad kem ding. Halor kane ka jingjia, na ka liang ki tnat syntiat ki dang lum ïa ki jingtip bad halor ka jinglong jingman.
Na ka liang jong ki tnat tohkit ba hakhmat jong ka India, kum ka National Investigation Agency (NIA), ka Central Armed Police Force, ka National Security Guard (NSG) ruh ki la wan mar-mar sha kane ka jaka ban pynlong ka jingtohkit bad ïarap ïa ki pulit ka Delhi. Kane ka jingbthei jong u bom, ka la wan jia ruh ka sngi ba la ïoh ban kurup haduh 2,900 kilo ki tiar pynbthei tang 50 km na kane ka jaka, kata na Faridabad ha Haryana.
Shuh shuh katkum ki khubor kiba la paw, la ong ba kane ka kali kaba la bthei ka dei ka Hyundai i20 kaba don ïa u number plate ka Haryana bad kaba la register ha ka kyrteng jong u Nademm, kaba la bthei habar jong ka Gate 1 jong ka Lal Qila Metro Station.
Halor kane ka jingjia, na ka liang u Myntri ka tnat Kam Pohïing ka Sorkar Kmie u Amit Shah, u la dep ban pynsngew ha u Myntri Rangbahduh ka Ri u Narendra Modi.
Watla ym pat lah ban tip ïa ka tynrai jong ka jingbthei, hynrei la pynkhlaiñ ïa ki bor pahara bad ka jingpeitngor khamtam ha khappud Indo-Nepal. La pynkhlaiñ ruh ïa ki bor pahara kum ha Mumbai, Jaipur, Uttar Pradesh bad Uttarakhand.
